Shtresa e vogël e borës ka shkaktuar probleme në qarkullimin rrugor sidomos në pjesët rurale të komunës së Kërçovës. Që nga  orët e pasditës, rruga magjistrale në drejtim të Gostivarit u ndalua për automjetet e tonazhit të rëndë.

Edhe përkundër intensitetit të dobët të reshjeve të borës, qarkullimi rrugor në rajonin e Kërçovës është vështirësuar dukshëm. Vështirësi më të theksuara janë paraqitur në rrugët e zonave rurale, ku nuk janë hedhur preparatet për shkrirjen e borës. Si pasojë e ngricave në disa fshatra të zonave malore në pjesën veri-lindore të komunës, rrugët janë bërë të pakalueshme edhe për automjetet e lehta.

Edhe në fshatrat e rrethit të Zajazit qarkullimi rrugor është rënduar tejmase. Përskaj rrugës për në fshatin Zajaz janë rrëzuar disa shtylla të energjisë elektrike dhe pritet intervenimi i EVN-së për të evituar problemet e furnizimit me rrymë elektrike.

Në pjesën qëndrore të qytetit lëvizja e makinave zhvillohet pa pengesa të mëdha, ndërsa ngricat e shkaktuara nga rreshjet e sotme, kanë sjellë probleme për banorët e disa lagjeve periferike të qytetit.

Në rrugën magjistrale qarkullimi rrugor është zhvilluar normalisht, por për shkak të intensifikimit të rreshjeve, në orët e pasditës, dy kamionë kanë bllokuar aksin rrugor Strazhë. Për shkak të vështirësive të krijuara, është vendosur ndalesa për automjetet e tonazhit të rëndë që lëvizin në drejtim të Gostivarit, ndërsa për automjetet e lehta preferohet kujdes i shtuar dhe përdorimi i pajisjeve dimërore.