Aksidenti i djeshëm afër qendrës tregtare “City Mall” ka tronditur opinionin. Kalimi në korsinë e këmbësorëve ka rezultuar fatal për një vajzë të re 24-vjeçare nga Radovishi, e cila ka humbur jetën. I lënduar ka mbetur edhe një këmbësor nga Radovishi, i cili ndodhet në spital. Ata u goditën nga një person 22 vjeçar i cili po ngiste veturën e tipit “Citroen”. 

Mësohet se bëhet fjalë për vozitës fillestar. Sipas informacioneve, ai ka marrë patentë shoferin një vit më parë, por fuqia e mjetit ka qenë brenda të lejuarës për fillestarët. Shoferit i është marrë mostër gjaku dhe urine për të përcaktuar nëse ka qenë nën ndikimin e alkoolit apo drogës. Menjëherë pas aksidentit, semaforët në kryqëzimin në City Mall nuk kanë funksionuar fare dhe më pas është ndezur vetëm drita e verdhë. Tani mbetet dilema nëse semaforët kanë funksionuar në momentin e aksidentit dhe kush ka kaluar në të kuqe?

“Për të gjitha detajet e hetimit do t’i drejtoheni Prokurorisë. Ne veprojmë sipas udhëzimit të prokurorit, mbledhim të gjitha provat dhe ia dorëzojmë prokurorisë”, tha Toni Angelovski, zëdhënës në MPB-së.

Prokuroria nuk tregon nëse semaforët kanë funksionuar dhe nëse ndonjëri nga palët e përfshira në aksident ka kaluar në semafor në të kuqe.

“Është lëshuar urdhër për sigurimin e pamjeve video-mbikëqyrëse në vendin e aksidentit”. thonë nga  Prokuroria.

Ndryshe, shoferi është arrestuar menjëherë dhe ndaj tij po përgatitet kallëzim penal. Sipas Këshillit Republikan për Siguri në Komunikacion, faktori njerëzor është pothuajse gjithmonë shkaktar i aksidenteve, veçanërisht shpejtësia.

“Në Bashkimin Evropian tashmë ka një iniciativë për uljen e shpejtësisë në zonat urbane në 30 kilometra në orë, sepse sa më ngadalë të vozitni, më të mëdha janë shanset për frenim në rast të pasojave të padëshiruara”, tha Dejan Andonoviq, Zëdhënës i KRSK .

Vetëm vitin e kaluar, policia regjistroi më shumë se 100,000 shoferë që kanë vozitur shpejtë. Ka pasur edhe një rast kur një automjet ka lëvizur me shpejtësi 300 kilometra në orë.