Miqësore spektakolare me 6 gola mes Spanjës dhe Brazilit në “Santiago Bernabeu”. Plot 3 penallti të akorduara, 2 për iberikët dhe një për kombëtaren “selçao”, teksa goli i shënuar me 11-metërsh nga Paketa “sigloi” shifrat në 3 me 3.

Pjesa e parë prodhoi 3 gola. Spanja shënoi 2 herë me Rodrin dhe Olmon në minutat 12 dhe 36. Mesfushori i Sitit ishte ai që zhbllokoi sfidën nga pika e bardhë e penalltisë, ndërkohë që Rodrigo, shënoi golin që ngushtoi shifrat në 2-1.

Në pjesën e dytë, trajneri i Brazilit hodhi në fushë talentin 17-vjeçar Endrik, të cilit 4 minuta në fushë i mjaftuan për të shënuar golin e barazimit të përkohshëm 2-2. Ky ishte goli i dytë radhazi për Endrik, pas atij të shënuar ndaj Anglisë.

Sfida regjistroi një fund emocionues, ku fillimisht ishte Rodri që ngriti shifrat në 3-2 duke u treguar i saktë nga pika e bardhë e penalltisë, e dyta për Spanjën në këtë përballje, ndërkohë që po nga pika e penalltisë, Paketa shënoi golin e barazimit, duke shmangur kështu humbjen.