Integrimi evropian i Ballkanit Perëndimor është interes kombëtar, si i dy vendeve kandidate për anëtarësim, ashtu edhe i anëtarëve të Bashkimit Evropian, u pajtuan në takimin e sotëm ministri i Punëve të Jashtme Bujar Osmani dhe homologja e tij bullgare Teodora Gençovska e cila është pjesë e delegacionit të lartë qeveritar të Republikës së Bullgarisë, i kryesuar nga kryeministri Kiril Petkov, i cili sot po qëndron për vizitë zyrtare në vend.

Siç kumtoi MPJ-ja, të dy ministrat theksuan se mbeten të përkushtuar në procesin e afrimit të rajonit me Bashkimin Evropian, duke theksuar rëndësinë e fqinjësisë së mirë dhe bashkëpunimit rajonal, si një investim në të ardhmen e përbashkët evropiane.

“Në takim u përshëndet ripërtëritja e dialogut mes dy Qeverive, si dhe rëndësia e vazhdimit të komunikimit intensiv në nivel të lartë me çka u shpreh besimi se me dinamikën e re në komunikim do të arrihet përmirësimi i nevojshëm i marrëdhënieve bilaterale”, theksohet në kumtesën e Ministrisë së Punëve të Brendshme.

Fokus i bisedimeve ishte seanca vijuese e përbashkët e Qeverive, e cila do të mbahet në Sofje më 25 janar, si dhe futja e dinamikës së re në bashkëpunim përmes zbatimit të konceptit të grupeve të punës, me çka u shqyrtuan fushat konkrete në të cilat ka potencial për avancim. Me këtë, të dy vendet do të dërgojnë sinjal të qartë se ekziston vullnet i fuqishëm për hapërim dhe mirëkuptim të ndërsjellë, në frymën e fqinjësisë së mirë dhe vlerave evropiane.

“Vizita ndodh në 30-vjetorin e njohjes së parë të pavarësisë së vendit tonë, e cila erdhi pikërisht nga Republika e Bullgarisë, por kjo është edhe vizita e parë e Kryeministrit, Petkov në rajonin e Ballkanit Perëndimor në përgjithësi, e cila dërgon një mesazh shumë të rëndësishëm dhe të vlefshëm për marrëdhëniet tonat, por jo më pak i rëndësishëm për dinamikën tonë dhe besoj se është një qasje ndryshe në tejkalimin e sfidave me të cilat përballemi”, tha Ministri, Osmani pas takimit, duke shtuar se është e rëndësishme që të identifikohen hapat konkretë për bashkëpunim, përmes iniciativave, aktiviteteve dhe projekteve në një kohë sa më të shkurtër, për çka të dy Ministritë e Punëve të Jashtme dhe resorët e tjerë do të japin kontributin e tyre konkret.

Lidhur me bashkëpunimin ekonomik, Ministrat e përshëndetën rritjen e shkëmbimit tregtar mes dy vendeve nga 30 për qind gjatë vitit 2021 dhe i shprehën pritshmëritë e tyre që gjatë vitit 2022 do të ruhet ritmi pozitiv i rritjes së të dyja ekonomive dhe shkëmbimit tregtar mes tyre, si dhe trendi pozitiv i investimeve të reja, të cilat duhet të mbështeten nga të dyja shtetet.