Presidenti i Serbisë, Aleksandar Vuçiq ka dhënë një intervistë për rrjetin amerikan CNN pas tensioneve të ditëve të fundit në veri të Kosovës, ku mes të tjerash u shpreh se Serbia i ka plotësuar të gjitha detyrimet e Marrëveshjes së Brukselit, teksa Prishtina zyrtare asnjë prej tyre, përfshirë dhe kushtin e formimit të Asociacionit të komunave me shumicë serbe.

Lideri serb ka akuzuar kreun e qeverisë së Kosovës, Albin Kurti se që nga koha që ai ka ardhur në pushtet, janë kryer dhjetëra sulme ndaj serbëve në veri, të motivuara etnikisht, të cilat nuk kishin ndodhur në të tilla përmasa më herët.

“Vetëm këtë vit, janë kryer 5 sulme me armë ndaj civilëve të nacionalitetit serb. Serbët vetëm duan siguri për veten dhe familjet e tyre”, u shpreh Vuçiç.

Gjatë intervistës, kreu i shtetit serb vlerësoi deklaratat e sekretarit amerikan të Shtetit, Antony Blinken dhe presidentit francez Macron për krizën në veri, të cilët e drejtuan gishtin nga kryeministri Kurti si përgjegjës për dhunën.

“Ne e kemi respektuar Marrëveshjen e Kumanovës dhe Rezolutën 1244 të OKB-së. Ne nuk kemi hyrë në Kosovë me ushtarë. Deri më tani ne kemi pasur bashkëpunim profesional me trupat e NATO-s në Kosovë dhe jam i bindur se ky bashkëpunim do të vazhdojë”, shtoi Vuçiq.

Mes të tjerash, presidenti serb mohoi të ketë ushtuar presion ndaj qytetarëve serbë për të mos dalë në zgjedhjet lokale të prillit dhe shtoi se dëshiron që situata në veri të zgjidhet në mënyrë paqësore.

“E di se ata janë të vendosur që t’i mbrojnë vatrat e tyre dhe unë u bëj thirrje që të protestojnë në mënyre paqësore”.

Kosova dhe Serbia i kanë nisur negociatat për normalizim të marrëdhënieve, të ndërmjetësuara nga Bashkimi Evropian, më 2011. Palët kanë nënshkruar dhjetëra marrëveshje, por jo të gjitha janë zbatuar.