Në kuadër të “Ditëve të hapura” në Universitetin e Tetovës, me datë 25.04.2024, në hapësirat e Fakultetit Pedagogjik u realizua takim dhe punëtori me përfaqësuesit (drejtorët dhe edukatorët) e kopshteve për fëmijë që realizojnë aktivitete në gjuhën shqipe në Maqedoninë e Veriut.

Dekani i Fakultetit Pedagogjik të Universitetit të Tetovës, prof.dr. Lulzim Mehmedi, i falënderoi të pranishmit për pjesëmarrjen dhe theksoi se ky është një kapitull i ri i bashkëpunimit trilateral midis: Fakultetit Pedagogjik, kopshteve për fëmijë në gjuhën shqipe dhe shoqatës „Arsimi” në Zvicër. Dekani, para të pranishmëve shtoi që ky bashkëpunim ka të bëjë me zhvillimin profesional të edukatorëve.Trajnimi u realizua nga përfaqësuesit e shoqatës “Arsimi” nga Zvicra, edhe atë nga Erika Masina Beuggert e cila në Kosovë dhe Maqedoni të Veriut njihet si Ambasadore e profesionit të mësuesisë për ciklin parashkollor dhe nga docenti i shkencave sociale – pedagogjike dhe edukative – arsimore doc. dr. Mahir Mustafa, i cili jeton dhe vepron në Zvicër.Pjesa e parë e trajnimit u zhvillua me temën “Mësimi përmes lojës” përmes ndërlidhjes së anës teorike, të bazuar në të dhënat e studimeve shkencore të fundit dhe anës praktike, përmes përvojave praktike nga Zvicra e Kosova.

Pjesa e dytë iu kushtua strukturimit të një pune gjysmëdite konkrete me fëmijët në kopshtet parashkollore, me aktivitete të drejtuara nga edukatorët, aktivitete kreative të lira, punë të dorës kreative e prodhuese, etj. Në pjesën e tretë u prezantua struktura dhe përmbajtjet e kursit bazik pesëditor. Në pjesën e katërt u diskutua mënyra e realizimit të kursit dhe pëzgjedhja e pjesëmarrësve. Kursi pesëditor do të mbahet në periudhën 14 -18.X.2024 dhe do të financohet nga shoqata “Arsimi-Bildung”.

Nga pjesëmarrësit e kursit bazik do të bëhet përzgjedhja e edukatoreve të cilat do t’i ndjekin kurset vijuese për trajnuese/multiplikatore. Bartës dhe realizues të projektit do të jenë Fakulteti Pedagogjik dhe “Arsimi”. Në aktivitetin e përmendur më sipër, të theksojmë sërish se pjesëmarrës nga kopshtet për fëmijë ishin: drejtorë të kopshteve dhe edukatorë nga Tetova, Gostivari, Kërçova, Dibra, Saraji, Çairi dhe Likova