Poashtu policia e Tetovës thekson që maturantët të marrin më seriozisht këta apele pasi që kanë qëllim të mirë dhe në mënyrë dinjitoze të festojnë dhe në asnjë moment të mos kontribuojnë për prishjen e rendin dhe prishjen e festës së tyre

Urim HASIPI

Tetovë, 17 maj – Pjesa e dytë e muajit maj është periudha kur në rajonin e Tetovës dhe Gostivarit, dhe jo vetëm, organizohen mbrëmjet e maturës. Jo rrallë herë, organizimi i këtyre mbrëmjeve kalon pa probleme dhe paraqet një sfidë për organet e rendit, për shkak të kaosit para lokaleve ku mbahen mbrëmjet por edhe për shkak se shumë maturantë ende pa u pajisur me leje për vozitje në natën e maturës marrin veturat. Kjo dyfish shton rrezikun që mbrëmjet e maturës nga një manifestim i shumëpritur të kthehen në tragjedi, siç ka ndodhur edhe në të kaluarën.

Nga Sektori për Punë të Brendshme në Tetovë, apelojnë që maturantët të përmbahen nga përdorimi i veturave të tyre apo të prindërve për transport deri tek lokalet ku do të mbahet mbrëmja e maturës.

“Atyre që kanë vendosur që të shfrytëzojnë makinat e tyre u sugjerohet që të mos drejtojnë makinat nëse janë në ndikim të alkoolit apo pa bashkëvozitës sidomos nëse janë vozitës fillestarë. Poashtu apelohet që maturantët të respektojnë rregullat dhe shenjat e komunikacionit dhe të mos e vendojnë në pikëpyetje sigurinë e tyre dhe pjesëmarrësve të tjerë në komunikacion. Njëkohësisht apelohet që të mos prishin rendin dhe qetësinë publike në shkolla apo objekte hotelerike duke lëshuar muzikë me zë të lartë”, deklaroi zëdhënësi i SPB-Tetovë, Fatmir Rexhepi.

Prandaj, ndër vite, Sektori për Punë të Brendshme në Tetovë organizon aktivitete parandaluese për mbarëvajtjen e sigurt të festimeve të maturës. “Zyrtarët policorë nga departamenti për parandalim në Sektorin për Punë të Brendshme në Tetovë kanë filluar kontaktet dhe takimet e punës me pronarët e objekteve hotelerike nga rajoni i Tetovës dhe Gostivarit,ku organizohen manifestimet e semi-maturës dhe maturës. Duke vepruar kështu, punonjësit e policisë theksuan përgjegjësinë për respektimin e detyrimeve ligjore, para së gjithash në fushën e rendit dhe qetësisë publike, si dhe pasojat që rrjedhin nga mosrespektimi i tyre. Këto aktivitete do të vazhdojnë edhe në ditët në vijim, në të gjitha objektet hotelerike për të mundësuar mbajtjen e sigurt të festimeve të maturës”, thotë zëdhënësi Fatmir Rexhepi.

Poashtu policia e Tetovës thekson që maturantët të marrin më seriozisht këta apele pasi që kanë qëllim të mirë dhe në mënyrë dinjitoze të festojnë dhe në asnjë moment të mos kontribuojnë për prishjen e rendin dhe prishjen e festës së tyre. Viteve të fundit, nuk janë regjistruar prishje të rënda të qetësisë publike për sa i përket festës së maturës, ndërsa më të theksuara problemet kanë të bëjnë me shkeljet në komunikacion, sidomos pas përfundimit të mbrëmjes së maturës. (koha.mk)