Delegacioni qeveritar i kryesuar nga kryeministri Hristian Mickoski nga sot merr pjesë në Samitin e NATO-s në Uashington i cili shënon 75 vjetorin e formimit të Aleancës. Janë paraparë një numër i madh i takimeve bilaterale me burrështetas të vendeve anëtare të Aleancës, por mbetet e paqartë nëse në margjinat e Samitit, Mickoski do të takohet edhe me kryeministrin grek, Kiriakos Micotakis.

Nga Qeveria nuk ka asnjë konfirmim zyrtar, ndërsa nga VMRO-DPMNE të dielën deklaruan se nuk kanë informacione për takim të mundshëm bilateral, por se samitet e tilla ndërkombëtare janë vende ku aplikohet diplomacia bashkëkohore.

“Tani për tani nuk ka informacione për takim të mundshëm bilateral me Micotakisin, por tubimet ndërkombëtare, samitet janë vende ku aplikohet apo zbatohet diplomacia bashkëkohore. Domosdoshmëria për qasje të re në mbrojtjen e interesave të qytetarëve të saj, negocimi dhe veçanërisht promovimi i marrëdhënieve në të gjitha fushat dhe promovimit të saj ndërkombëtar në tërësi, përcakton qëndrimin e Qeverisë ndaj diplomacisë, bazuar në respektin reciprok dhe ndërtimin e urave miqësore dhe respekt të ndërsjellë dhe marrëdhënie të mira fqinjësore”, deklaroi të dielën Mile Lefkov, anëtar i Komitetit ekzekutiv të VMRO-DPMNE-së.

Zëdhënësi i qeverisë greke, Pavlos Marinakis deklaroi dje se nuk është planifikuar ndonjë takim, por nuk përjashtohet që në margjinat e Samitit të ketë takime bilaterale.

“Nuk është planifikuar takim, por nuk përjashtohet që në kuadër të aktiviteteve dhe margjinat e Samitit të NATO-s, kryeministri të ketë takime bilaterale. Por diçka të planifikuar nuk ka”, ka thënë Marinakis i pyetur nga MIA për takimin e mundshëm Micotakis-Mickoski.

Zëdhënësi i qeverisë greke në brifingun e djeshëm me gazetarët tha se Micotakisi në Samitin e NATO-s “do ta ngrejë në nivelin më të lartë” respektimin e Marrëveshjes së Prespës.

“Ai do ta ngrejë çështjen në nivelin më të lartë. Ai do të përmendë Traktatin që nuk po respektohet, veçanërisht çështjen me emrin kompleks erga omnes. Ai do të përmend një sërë deklaratash që janë në kundërshtim me Marrëveshjen e Prespës, pra në kundërshtim me atë që është votuar nga të dy vendet, sepse siç e kuptoni prezenca e Maqedonisë së Veriut në NATO është rezultat i kësaj marrëveshjeje, por shteti ynë fqinj nuk e respekton as faqen e parë të kësaj Marrëveshjeje dhe është diçka që kuptohet që do ta iniciojë Kiriakos Micotakis”, tha Marinakis.

Mickoski, para largimit për në Uashington deklaroi se nëse ka takime me kryeministrin grek në Samitin e ardhshëm të NATO-s në Uashington, shpreson se do ta ruajnë dinjitetin dhe se do të bisedojnë si partnerë dhe si fqinj të mirë.

“Shpresoj se do ta mbajmë dinjitetin dhe se do të bisedojmë si partnerë dhe si fqinj të mirë, nëse vjen deri në një marrëveshje të këtillë. Nëse nuk arrihet shpresoj se së shpejti do të vijë”, theksoi Mickoski.

Ai theksoi se qëndrimi i Qeverisë është të ndërtojë marrëdhënie të mira me të gjithë fqinjët, por se marrëdhëniet janë rrugë të dyanshme.

“Qëndrimi ynë si Qeveri është se duam të kemi marrëdhënie të mira me fqinjët, që duam të ndërtojmë ura për bashkëpunim, se për ne është rrugë e dyanshme. Mendoj se deri më tani ata ishin mësuar me një rrugë njëkahëshe, por tani jemi politikanë dhe një qeveri që dëshiron të drejtojë një rrugë dykahëshe për fqinjësi të mirë dhe kështu do të vazhdojmë të sillemi”, tha kryeministri i  javën e kaluar.

Nga ana tjetër, SHBA thekson se nuk duan të futin mosmarrëveshje dypalëshe në NATO. Drejtori për Evropë dhe NATO në Pentagon, Olton Bjuland, së fundmi në një intervistë për Zërin e Amerikës në gjuhën maqedonase, theksoi se SHBA-ja e mbështet fuqishëm Marrëveshjen e Prespës dhe shpreson që kontestime dypalëshe të mbeten jashtë Aleancës së NATO-s.

“Çdoherë i inkurajojmë aleatët dhe partnerët tanë që t’u përmbahen marrëveshjeve dhe t’i lënë kontestet dhe mosmarrëveshjet bilaterale jashtë NATO Aleancës, që të sigurohet se ka bashkëpunim dhe stabilitet rajonal në rajonin e juaj”, tha Bjuland.

Ndërkohë, kompania amerikane “Vabtek” është investimi i ri i huaj që do të investojë 35 milionë euro në vend dhe do të hapë 100 vende pune. Kompania do të investojë në prodhimin e frenave për automjetet hekurudhore.

Emrin e investimit të ri e bëri të ditur vetë kryeministri Hristijan Mickoski, i cili në Uashington pati një takim me nënkryetarin ekzekutiv të kompanisë.

“Pas investimit të Alkazar Enerxhi prej 500 milionë dollarësh në parkun me erë, që është më i madhi në rajon, dhe investimit të kompanisë gjermano-belge Epsoteh Aim në Petrovec prej 20 milionë eurosh, Vabteki amerikan do të investojë në Maqedoni. Kompania Vabtek është pjesë e pesëqind kompanive më të mëdha në Shtetet e Bashkuara të Amerikës. Kam pasur një takim me nënkryetarin ekzekutiv të kompanisë në Uashington, ku u konfirmua dinamika e realizimit të investimit të ri. Mbi 100 vende të reja pune, një investim me vlerë 35 milionë euro. Investimet do të bëhen në prodhimin e frenave për mjetet hekurudhore. Eksport më i madh për një të ardhme më të mirë”, ka shkruar Mickoski në Fejsbuk.