Një postim i rastësishëm në platformën X nga një historian i artit, ka çuar në gjetjen e një portreti të Mbretit Henry VIII – që po qëndronte i varur në korridorin e Këshillit Komunal në West Midland – dhe më pas u identifikua si vepra e famshme e artit e zhdukur para shumë kohësh.
Adam Busiakiewicz, i cili punon si konsulent për shtëpinë e famshme të ankandeve “Sotheby’s”, ka thënë se kur e pa një fotografi të veprës së varur në ndërtesën “Shire Hall” në qarkun Warwick, thjesht i kishte rënë në sy.
Pasi e inspektoi personalisht për të konfirmuar teorinë e tij, konstatoi se vepra artistike ishte krijuar për prodhuesin e tapicerive, Ralph Sheldon dhe daton në vitet 1590. Ishte pjesë e një koleksioni prej 22 portretesh të realizuara për Sheldonin, por dihej vendndodhja e vetëm disa prej këtyre veprave.
“Është emocionues fakti që për vetëm një orë, kisha fatin e mirë për ta kuptuar se çfarë vepre ishte”, ka thënë Busiakiewicz.
Postimi në platformën X që i ra në sy ishte nga llogaria e “Warwickshire Lieutenancy”. Aty ishte shpërndarë një fotografi e një pritjeje zyrtare në “Shire Hall” dhe në sfond dukshëm shihej portreti i famshëm.
“Kaloj shumë kohë duke menduar për piktura dhe duke i vëzhguar muret e njerëzve”, ka shpjeguar Busiakiewicz.
Historiani i lindur në Warwick, por që jeton në Londër, më pas paralajmëroi autoritetet lokale për atë që ai dyshonte se kishte në ndërtesën e këtij institucioni, derisa Këshilli i Qarkut Warwickshire e kishte ftuar t’ia hidhte një sy veprës së artit. Sipas tyre, prej momentit të zbulimit të veprës, ajo është zhvendosur për hulumtime të mëtejme në Qendrën e Koleksioneve të Muzeut.
Busiakiewicz e përshkroi atë si një “portret të mrekullueshëm” të një prej mbretërve më të famshëm të Anglisë.
Rrugëtimi i veprës së humbur prej kohësh nuk është plotësisht i qartë, por portretet e Sheldonit kishin qëndruar të varura në ndërtesën historike “Weston House” në Long Compton, Warwickshire, përpara se të shiteshin në ankand.
Sa i takon vlerës së tyre, Adam Busiakiewicz nuk di ta thotë sigurt, por deklaroi se vepra të tjera arti të Sheldonit ishin shitur për 200 mijë funte.
Sipas tij, njerëzit në mbarë botën i donin Tudorët dhe shpresonin se portreti do të ekspozohej në mënyrë që publiku të kishte mundësi ta shijonte atë.
“Shpresoj se portreti do të admirohet edhe më shumë, është imazhi më i famshëm i Warwickshire”, ka thënë ai.
Historiani i qarkut Warwick, Aaron Manning, i cili e ndihmoi Busiakiewiczin me hulumtimin e tij, ka thënë se zbulimi i këtij portreti e pasuron dhe më shumë historinë e qytetit.
