Kandidatja demokrate për presidente, Kamala Harris foli për herë të parë në rrjetin televiziv Fox News, i njohur për qëndrimet konservatore, në një intervistë e cila u shoqërua me tensione për çështjen e emigrantëve dhe ndryshimin e qëndrimeve politike.

Harris pranoi dështimet në kufirin jugor me Meksikën, ndërsa fajësoi republikanët për pengesat në miratimin e një projektligji për kufirin.

“Nuk jam krenare të them se ky është një sistem i përsosur emigrimi. Kam qenë e qartë, mendoj se të gjithë jemi të qartë që duhet rregulluar. Është gjithashtu e vërtetë që nëse një siguri kufitare do të ishte miratuar nëntë muaj më parë, do të kishim më shumë agjentë në kufi, më shumë mbështetje. Donald Trump u kërkoi republikanëve të refuzonin një projektligj dypartiak mbi imigracionit sepse atij i pëlqejnë problemet në vend që t’i zgjidhë ato”, tha Harris.

Harris siguroi se nëse do të zgjidhet presidente, mandati i saj nuk do të jetë vazhdim i presidencës Biden.

“Unë përfaqësoj një gjeneratë të re të lidershipit. Unë, për shembull, jam dikush që nuk e kam kaluar pjesën më të madhe të karrierës sime në Uashington, DC. Ftoj këdo, qofshin republikanë, sektorin e biznesit dhe të tjerë që mund të kontribuojnë në vendimet që do të marr unë”, tha Harris.

Intervista për Fox News, vjen si një përpjekje e drejtpërdrejtë e Harris për të fituar mbështetjen e një numri të vogël republikanësh të pakënaqur me Trump./vizionplus.tv