Me miratimin e Dhomave të Specializuara të Kosovës ishte miratuar edhe ligji që garanton mbrojtje juridike dhe mbështetje financiare për të gjithë personat që ballafaqohen me këto aktakuza, por sivjet Ministria e Drejtësisë ka hequr nga amendamenti mbulimin e shpenzimeve të paparashikuara, duke mbuluar vetëm shpenzimet brenda limiteve të përcaktuara. Njohësit e drejtësisë thonë se është mungesë e vullnetit politik për ta adresuar këtë çështje.

Ministria e Drejtësisë në vitin 2024 ka bërë plotësim-ndryshimin e Udhëzimit Administrativ për mbrojtje juridike për personat e akuzuar nga Dhomat e Specializuara në Hagë. Megjithatë, jo të gjitha shpenzimet e të akuzuarve, të cilët po mbahen në paraburgim në Hagë, po mbulohen.

Astrit Kolaj nga Instituti i Kosovës për Drejtësi, tha se shteti i Kosovës duhet t’i mbulojë të gjitha shpenzimet e avokatëve, por edhe shpenzimet tjera për të siguruar përfaqësim sa më dinjitoz për të gjithë të akuzuarit ose të dyshuarit.

“Sepse plotësim-ndryshimi i ka hequr këto dy pika, mirëpo këto nuk e arsyetojnë shtetin, duhet të sigurojnë mbrojtje sa më efektive për të gjithë të akuzuarit në këtë gjykatë. Duhet të sigurohen të gjitha kushtet dhe duhet të merren shembull edhe shtetet e rajonit siç është Kroacia, si ka vepruar me mbrojtjen e të akuzuarve të vet dhe të gjithë të akuzuarve duhet të ju sigurohet një mbrojtje sa më efikase dhe e dinjitetshme në Dhomat e Specializuara të Kosovës”, tha Kolaj.

Avokati Ardian Bajraktari thotë se mbrojtja juridike dhe mbështetja financiare e personave, të cilët akuzohen nga Dhomat e Specializuara, është obligim ligjor i shtetit të Kosovës.

“Prej ndryshimeve të fundit që janë bërë është hequr mundësia që kur për shkaqe të arsyeshme ka tejkalim të shpenzimeve nga ana e Ministrisë me Udhëzim Administrativ kjo mundësi shtesë është hequr, prandaj vlerësoj se kjo është kryekëput refleksion i mungesës së vullnetit politik për ta adresuar këtë çështje tepër me rëndësi, për faktin se të njëjtit ballafaqohen atje në kapacitet ish-krerëve të UÇK-së”, tha avokati Bajraktari.

Fondacioni “Përkrahje për Mbrojtjen Juridike të Hashim Thaçit”, kërkon nga Qeveria e Kosovës që t’i mbulojë të gjitha shpenzimet për mbrojtje profesionale, në përputhje me ligjin e miratuar nga Kuvendi i Kosovës për këtë qëllim.

“Në kërkojmë vetëm respektim të ligjit. Ndryshimet e bëra në Udhëzimin Administrativ e kanë vënë ekipin mbrojtës të ish-presidentit Thaçi në situatë të pamundësisë objektive për ta kryer funksionin e tij. Në mungesë të mjeteve financiare është larguar edhe njëri prej avokatëve kryesore të z. Thaçi, por edhe aktualisht po përballemi me vështirësi të mëdha për mbulimin e shpenzimeve dhe ruajtjen e pjesëtarëve të ekipit mbrojtës”, thuhet në një përgjigje për RTK-në.

Nga ana tjetër, Shqipe Selimi, bashkëshortja e ish-komandantit të UÇK-së, Rexhep Selimi, i cili, po ashtu, gjendet në Hagë, ka folur për këtë temë.

“Të gjitha shpenzimet e mbrojtjes së Rexhep Selimit janë mbuluar ashtu siç e parasheh marrëveshja mes avokatit dhe Ministrisë së Drejtësisë”, tha ajo.

Nga kjo ministri nuk i janë përgjigjur pyetjes së RTK-së lidhur me këtë fond. Por, RTK ka mësuar së buxheti i ndarë për vitin 2024 për këtë divizion është mbi gjashtë milionë euro, ndërsa shuma e cila është shpenzuar nga janari deri në korrik të këtij viti, për mbrojtjen e të akuzuarve, ka arritur shifrën mbi tre milionë euro. /ekonomiaonline/