Lideri opozitës në Gjeorgji është arrestuar dje dhe rrahur nga policia derisa kishte humbur ndjenjat, mes protestave të dhunshme që kanë përfshirë vendin që prej javës së shkuar, kundër zgjedhjeve në favor të qeverisë pro-ruse.
Policia kishte bastisur zyrat e partisë opozitare Koalicioni i Ndryshimit, dhe shpërndau videon e ndalimit të dhunshëm të liderit Nika Gvaramia, shkruan rrjeti britanik Metro.
Përshkallëzimi i fundit vjen teksa partia në pushtet vendosi ndalimin e negocjatave për aderim në Bashkimin Evropian.
Policia ka përdorur ujë me presion dhe gaz lotsjellës ndaj protestuesve të maskuar me flamurë evropianë, të cilët kanë qëlluar oficerët me fishekzjarre dhe kanë ngritur barrikada në bulevardin qendror në kryeqytetin Tbilisi.
Më shumë se 300 protestues janë arrestuar prej të enjtes së shkuar dhe më shumë se 100 njerëz janë trajtuar për plagë të ndryshme gjatë protestës, thonë autoritetet.
Kryeministri Irakli Kobakhidze, thotë se veprimet dhe bastisjet e policisë kanë goditur nxitësit e dhunës gjatë protestave: “Unë nuk e quaj këtë shtypje por nja masë parandaluese”, tha ai për dhunën e policisë.
Opozita dhe presidenti pro-perëndimor kanë akuzuar qeverinë për manipulim të votës me ndihmën e Rusisë fqinje dhe kanë bojkotuar sesionet parlamentare.
BE ka përsëritur “shqetësimet për reduktimet demokratike në vend”, të qeverisë së Partisë Ëndrra Gjeorgjiane, shkruan rrjeti Metro.
