Çiklisti sirian Bassel Soufi përshkoi 40 kilometra me biçikletë nga qyteti i Latakias në veriperëndim të Sirisë, për të vizituar resortin privat bregdetar të familjes Assad, ndërsa banorë të zonës shëtisnin brenda mjediseve të resortit për herë të parë në jetët e tyre.

Pas një regjimi brutal 54-vjeçr të familjes Assad dhe nje lufte civile që zgjati rreth 13 vjet, rebelët sirianë arritën ta rrëzonin Presidentin Bashar al-Assad, në atë çka përbën një ndryshim mjaft të rëndësishëm në Lindjen e Mesme.

Nga ai moment, shumë prej pronave të presidentit Assad dhe familjes së tij janë plaçkitur ose shkatërruar nga zemërimi i qytetarëve sirianë, të cilët kërkojnë tashmë të fshijnë nga kujtesa trashëgiminë e tij.

Mes këtyre pronave, ishte edhe resorti masiv veror në Burj Islam. Resorti, që përfshin një vilë të bardhe me ballkone që shohin nga deti Mesdhe, plazhe private, kopshte të shumta dhe një shëtitore, befas u gjend në një situatë të mjeruar ditën e premte, pas dëmtimeve të shkaktuara nga plaçkitjet.

Dritaret u thyen, ndërsa dyshemeja u mbulua nga copëza xhamash. Nuk mbeti asnjë mobilje, ndërsa tualetet, dushet, dritat dhe të tjera orendi, po ashtu u thyen dhe shkatërruan.

“Për herë të parë në jetën time ndihem i lirë, qoftë edhe për faktin që mund të hyj këtu,” tha çiklisti 50-vjeçar Soufi, ndërsa filmonte detin me telefonin e tij cellular.

“Nuk arrij t’iu besoj syve. Paskan ndërtuar diçka të atillë, që ne të tjerët nuk e kemi parë kurrë në jetë,” tha për ‘Reuters’ ish-çiklisti i ekipit kombëtar sirian, teksa shtoi se mendon që tanimë, resorti duhet të jetë i hapur për të gjithë popullin dhe jo “për presidentin e radhës.”

Me rënien e regjimit të Assadit, banorët e zonës – kryesisht turkmenë të Sirisë që ishin përzënë nga fashtrat rreth e rrotull kur u ndërtua resorti – u kthyen në këtë zonë për herë të parë pas 50 vitesh. /REUTERS