Një javë jo të plotë pasi policia zbatoi aksionin për shkatërimin e grupit që merrej me trafikimin e veturave luksoze, Prokuroria Publike sot njoftoi se ka përfunduar procedura për sigurimin e provave dhe është dorëzuar aktakuza kundër 10 personave.

Lënda udhëhiqet nga PTHP – Shkup, kurse të dyshuarit, sic thuhet, krahas trafikimit me vetura luksoze, ngarkohen edhe për falsifikimin e dokumenteve zyrtare.

Aksioni policor kundër këtij grupi ishte zbatuar më 29 dhjetor në Shkup, Manastir, Negotinë, Dojran dhe Gjevgjeli, pas cka MPB-ja dorëzoi kallëzime penale kundër 13 personave.

Sic njoftoi PTHP-ja, në këtë rast dyshohen 11 persona, por procedura kundër njërit prej tyre – shtetas i Greqisë, i dorëzohet organeve greke.

Lidhur me dy të tjerët, të përfshirë në kallëzimin penal të MPB-së, nga PTHP-ja njoftuan se kallëzimet kundër tyre do të hidhen poshtë për shkak se janë të përfshirë në procedurën që PTHP-ja e ka inicuar paraprakisht.

Duke përshkruar ngjarjen, Prokuroria njoftoi se të dyshuarit gjatë vitit 2021 dhe 2022 me dokumente të rrejshme dhe numra të përmirësuara të makinave, kanë transferuar në vendin tonë automjete që kishin qenë në kërkim ndërkombëtar si dhe vetura me të cilët kanë shmangur kontrollet doganore.

Në mesin e të dyshurave janë edhe persona zyrtar, ku sipas PTHP-së, janë të punësuar në shërbime administrative për regjistrimin e automjeteve.

Një person vazhdon të mbetet në kërkim dhe për të është shpallur fletarresti ndërkombëtar, për shkak të implikimit në një lëndë tjetër të ngjashme për trafikimin e veturave luksoze, përderisa për një tjetër, në fuqi janë masat e kujdesit.