Vitin që lamë pas, Maqedonia e Veriut ka shënuar një numër të madh aksidentesh rrugore, duke përfshirë aksidente fatale dhe të tjera që kanë shkaktuar dëme materiale dhe pasiguri në trafikun e përditshëm. Dhe, kjo situatë ka nxitur autoritetet dhe shoqërinë për të marrë masa më të forta për të përmirësuar sigurinë rrugore dhe për të ulur numrin e aksidenteve, duke shpresuar që në vitin 2025 – të arrihet një nivel më i lartë i kujdesit dhe ndërgjegjësimit nga të gjithë pjesëmarrësit në trafik. Rreth 800 aksidente të rënda me 120 viktima dhe mbi 1500 të lënduar është bilanci i tri viteve të fundit në aksidentet rrugore. Shumë nga këto aksidente kanë ndodhur në periudha të lëvizshmërisë së madhe, si fundjavave dhe festave, kur trafiku është më intensiv.
Rritjen e numrit të aksidenteve, krahas Ministrisë së Punëve të Brendshme, e raporton edhe Agjencia për Sigurinë Rrugore. Madje, kjo e fundit ka propozuar masa shtesë për këtë vit, me qëllim uljen e numrit të aksidenteve. Investime në rinovimin dhe zgjerimin e rrugëve kryesore, si dhe ndërtimi i rampave dhe kalimeve të sigurta për këmbësorët dhe çiklistët është pika e parë në propozimin e ASRr, ndërsa kërkohet edhe vendosja e sa më shumë kamerave dhe sistemeve të monitorimit për të kontrolluar shpejtësinë dhe për të identifikuar drejtuesit e automjeteve që nuk respektojnë rregullat.
“Gjithashtu, duhet menduar për fushata të reja për të rritur ndërgjegjësimin e qytetarëve për rreziqet që shkaktojnë shpejtësia dhe përdorimi i celularëve gjatë drejtimit, si dhe për nevojën për të respektuar rregullat e trafikut. Duhet bërë forcimi i kontrolleve të trafikut, veçanërisht gjatë orëve të natës dhe ditëve me mot të keq, dhe aplikimi i sanksioneve të forta për shkelësit e rregullave të trafikut. Organizatat shoqërore dhe ato që promovojnë sigurinë rrugore duhet të intensifikojnë rolin e tyre në edukimin e qytetarëve për sjelljen e sigurt në rrugë dhe për krijimin e një kulture më të përgjegjshme të trafikut”, thuhet në propozimet e ASRr-së, ndërsa shtojnë se duhet rritur edhe angazhimi i institucioneve edukative.
“Shkollat dhe universitetet duhet të përfshihen më shumë në aktivitete edukative për rritjen e ndërgjegjësimit të të rinjve, duke i mësuar ata rregullat e sigurisë rrugore që nga mosha e hershme”, thonë nga ASRr, ndërsa shtojnë se këtë vit, do të jetë thelbësore që autoritetet dhe qytetarët të angazhohen për të zvogëluar aksidentet dhe për të siguruar një ambient më të sigurt në rrugë.
“Rritja e ndërgjegjësimit, përdorimi sa më pak i celularëve dhe teknologjive tjera gjatë drejtimit të automjeteve, si dhe investimet në infrastrukturë do të jenë pikat kryesore për të arritur një vit më të sigurt dhe me më pak aksidente”.
Ndryshe, edhe pse ka pasur disa përmirësime në rrugët kryesore të Maqedonisë së Veriut, disa segmente të rrugëve mbeten të dëmtuara dhe të rrezikshme për drejtuesit e automjeteve. Tani në dimër, reshjet e dëborës dhe ngricat kanë bërë që rrugët të bëhen edhe më të rrezikshme, duke rritur numrin e aksidenteve, veçanërisht në zonat malore dhe rurale.
