Prodhuesi britanik i makinave luksoze Rolls-Royce do të investojë 300 milionë Paund për të zgjeruar fabrikën Goodwood për t’u fokusuar në prodhimin e makinave të personalizuara.

“Ky investim është një hap i rëndësishëm për Rolls-Royce. Ështe një tregues i qartë i suksesit të kompanisë sonë. Ky investim do të na japë hapësirën që duhet për të krijuar modelet më komplekse të makinave dhe gjithashtu, do të na japë hapësirën që na nevojitet për të realizuar Rolls Royce që kërkojnë klientët tanë”, tha Chris Brownridge.

Ashtu siç ka ndodhur edhe me prodhuesit e tjerë të automjeteve, kompania Rolls-Royce ka parë një kërkesë në rritje për makina të personalizuara të cilat janë një luks i personave të pasur. Stafi që punon, kujdeset të plotësojë çdo tekë të klientëve.

“Në Rolls-Royce, ne kemi një grup njerëzish jashtëzakonisht të talentuar  të cilët punojnë për makinat e personalizuara. Këta janë individë që janë artistë dhe ata me të vërtetë po krijojnë art çdo ditë për klientët tanë. Si pjesë e rrjetit të zyrave tona private, në vitin 2024 ne hapëm një zyrë në Nju Jork dhe gjithashtu në Seul, ne kemi dizajnerë që ideojnë së bashku me klientët tanë makinën e ëndrrave”, tha Chris Brownridge.

Drejtuesit e kompanisë Rolls-Royce thonë se investimi në fabrikën Goodwood do t’u shërbejë klientëve të kenë akses në shërbimin Bespoke dhe programin Coachbuild.

E para është një shërbim vetëm me ftesa ku klientët mund të personalizojnë çdo aspekt të automjetit të tyre ndërsa sa i përket të dytës është një shërbim vetëm me ftesë për klientët e pasur që dëshirojnë të “krijojnë një makinë tërësisht origjinale”.

Investimi prej 300 milionë Paund është më i madhi që nga hapja e fabrikës në vitin 2003, kur ishin të punësuar 300 njerëz dhe prodhohej vetëm një makinë në ditë.

Sot, në fabrikën Goodwood janë të punësuar 2,500 njerëz dhe prodhohen 28 makina në ditë. Rolls-Royce tha gjithashtu se në nivel global shiti 5,712 makina në vitin 2024, një rënie prej më shumë se 5% kundrejt 6,032 makinave që shiti në 2023.

Kjo statistikë është në përputhje me pritshmëritë e kompanisë pasi po fokusohet në krijimin e makinave të personalizuara. Ndërkohë, drejtuesit janë të përgatitur edhe për vendosjen e tarifave të reja nga SHBA me ardhjen në pushtet të Donald Trump.

Ata thonë se një skenar i tillë nuk do të ndryshojë vizionin e kompanisë dhe objektivat e saj.

“Rolls – Royce ka një trashëgimi të jashtëzakonshme. Ne kemi prodhuar makina të bukura motorike për 120 vjet dhe ua shesim ato klientëve në të gjithë botën. Shtetet e Bashkuara të Amerikës janë një treg shumë i rëndësishëm për Rolls – Royce , por, ne kemi shumë tregje të tjera që janë gjithashtu shumë të rëndësishme. Pra, në të ardhmen në Shtetet e Bashkuara, a do të ketë një tarifë? Ajo që ne dime eshte se në industrinë e luksit klientët tanë priren të jenë gjithmonë më elastikë kur bëhet fjala për çmimin”, tha Chris Brownridge.

Veçanërisht, Lindja e Mesme ishte rajoni më i madh me porosi për nga vlera mesatare për makinë, e ndjekur nga Amerika e Veriut dhe Evropa. Në vitin 2024, Rolls-Royce gjithashtu përfitoi nga tregje më të vogla, por me rritje të shpejtë, duke përfshirë Malajzinë, Tajlandën dhe Holandën.