Cristiano Ronaldo do të vazhdojë të luajë edhe një sezon tjetër në Arabinë Saudite, duke e bërë këtë me një kontratë të parefuzueshme nga ana ekonomike. Por nuk është vetëm arsyeja financiare ajo që e mban të lidhur me Al Nassr.

Kjo duket se do të jetë një lidhje afatgjatë me një angazhim besnikërie të paprekshëm nga çdo tundim. Portugezi do të bëhet pronar i ekipit, me një pjesëmarrje të vogël, por që tregon besimin e madh që klubi ka vendosur tek ai.

Drejtuesit e klubit, në përpjekje për të treguar admirimin dhe kënaqësinë për atë që po bën CR7 që nga mbërritja e tij në Riad, i kanë ofruar – në formë dhurate – pesë për qind të pronësisë së klubit, një entitet historik sportiv saudit që aktualisht ndodhet në një proces ndryshimesh strukturore, me ardhjen e një CEO dhe presidenti të ri në muajt e fundit.

"Për mua është një nder që liga po rritet dhe që shumë lojtarë ‘yje’ po vijnë për ta bërë atë një ligë edhe më të mirë dhe më konkurruese."

Që nga mbërritja e tij, sjellja e Cristiano Ronaldos ka qenë jashtëzakonisht pozitive. Diçka që e karakterizon portugezin është përkushtimi i tij maksimal kudo që ka qenë. Që kur mbërriti tek Al Nassr, ai e ka trajtuar klubin si diçka personale, gjë që tani bëhet realitet me përfshirjen e tij si aksionar i vogël.

Rinovimi i kontratës nuk ka pasur dyshim nga pronarët dhe drejtuesit e Al Nassr, të cilët kërkojnë t’i ofrojnë ekipit mjetet e nevojshme për të rritur nivelin dhe për të konkurruar sërish për kampionatin e Ligës, i cili ka fituar shumë më tepër konkurrencë me ekipet si Al Hilal dhe Al Ittihad.

Sa i përket aspektit ekonomik, Ronaldo ka rinovuar për një sezon tjetër me një pagë prej 183 milionë eurosh, që përkthehet në 15.25 milionë euro në muaj, 3.8 milionë në javë dhe 550,000 euro në ditë, duke e mbajtur atë në krye të futbollistëve më të paguar në botë.

Një tjetër faktor që ka ndikuar në vendimin e tij për të qëndruar është premtimi për ta bërë ekipin më konkurrues se tani. Madje, është e mundur që në këtë merkato dimri të bëhen një ose dy përforcime për klubin saudit.

Cristiano Ronaldo dëshiron të rrethohet me futbollistë që u beson. Njëri prej tyre, sipas asaj që ka raportuar MARCA, mund të jetë Casemiro, i cili po përballet me vështirësi në ekipin e tij për shkak të situatës së keqe sportive te Manchester United. Nëse ndodh, kjo do të jetë hera e tretë që portugezi dhe braziliani ndajnë të njëjtën dhomë zhveshjeje. Hera e parë ndodhi për pesë sezone te Real Madridi, ndërsa hera e dytë ishte shumë më e shkurtër, pasi zgjati vetëm pesë muaj në ‘Old Trafford’.