Kryeministri britanik, Keir Starmer, ka mbërritur në kryeqytetin e Ukrainës të enjten, me një zotim për të ndihmuar në garantimin e sigurisë së vendit për një shekull, disa ditë përpara se Donald Trump të betohet president i SHBA-së.

Qeveria britanike ka bërë të ditur se Starmer dhe presidenti ukrainas, Volodymyr Zelensky do të nënshkruajnë një traktat "Partneriteti 100-vjeçar" në Kiev që mbulon fusha duke përfshirë mbrojtjen, shkencën, energjinë dhe tregtinë, raporton AP.

Vizita e paparalajmëruar e Starmerit është udhëtimi i tij i parë në Ukrainë që kur ai mori detyrën në korrik. Ai e vizitoi vendin në vitin 2023 kur ishte lider i opozitës dhe ka zhvilluar dy herë bisedime me Zelenskyn në Londër që kur është bërë kryeministër.

Mbretëria e Bashkuar, një nga mbështetësit më të mëdhenj ushtarakë të Ukrainës, ka premtuar 16 miliardë dollarë në ndihmë ushtarake dhe civile që nga pushtimi i plotë i Rusisë tre vjet më parë, dhe ka trajnuar më shumë se 50,000 trupa ukrainase në tokën britanike. Starmer do të shpallë një ndihmë tjetër në vlerë prej 49 milionë dollarësh për rimëkëmbjen ekonomike të Ukrainës pas luftës.

Por roli i Britanisë së Madhe është i zbehtë nga ai i Shteteve të Bashkuara dhe ka pasiguri të madhe mbi fatin e mbështetjes amerikane për Ukrainën pasi Trumpi të marrë detyrën më 20 janar.