Adoleshenti Andrea Kimi Antonelli ka marrë provimin e patentës vetëm gjashtë javë para se të bëjë debutimin e tij në Formula 1 për Mercedes në Çmimin e Madh të Australisë.

18-vjeçari, i cili po zëvendëson Lewis Hamilton-in pasi shtatë herë kampioni i botës vendosi të kalojë te Ferrari, u pa në një postim të Mercedes në rrjetet sociale duke qëndruar në një makinë autoshkolle, duke bërë shenjën “OK”, ndërsa postimi shoqërohej me mbishkrimin: “Mision i përmbushur”.

Në vitet e mëparshme, pilotët kanë qenë të detyruar të kenë një patentë të vlefshme për të fituar Super Licencën, e cila u lejon të garojnë në Formula 1. Gjithashtu, ata duhej të ishin të paktën 18 vjeç, transmeton A2 CNN.

Ky rregull u prezantua në vitin 2016, pasi Max Verstappen debutoi në F1 për Toro Rosso në Çmimin e Madh të Australisë kur ishte vetëm 17 vjeç e 166 ditë. Verstappen u përfshi në disa aksidente në fillimet e tij, përfshirë një përplasje me shpejtësi të lartë me pilotin e Lotus, Romain Grosjean, në Çmimin e Madh të Monakos gjatë sezonit të tij të parë. Megjithatë, këto incidente nuk e ndaluan pilotin e Red Bull-it, i cili ka fituar kampionatin botëror katër vite radhazi.

Rregullat u ndryshuan vitin e kaluar si pjesë e përpjekjeve të Mercedes për t’i dhënë Antonellit mundësinë të merrte pjesë në provat e Formula 1, përpara se të mbushte 18 vjeç, më 25 gusht 2024.

Kushti që pilotët të kishin një patentë u hoq dhe u shtua një klauzolë e re që lejonte dhënien e një përjashtimi special për pilotët 17-vjeçarë që kishin treguar “aftësi dhe pjekuri të jashtëzakonshme në garat e makinave njëvendëshe”.

“Presidenti i FIA-s gjithmonë ka pasur mundësinë dhe diskrecionin për të lejuar një pilot të garojë, nëse beson se performanca ishte mjaftueshëm e matur”, tha CEO i Mercedes F1, Toto Ëolff, për Formula1.com, në qershor. “Mendoj se ndryshimi i rregulloreve nuk ka të bëjë me Antonellin, por në përgjithësi për t’u siguruar që pilotët me përgatitjen, suksesin dhe pjekurinë e duhur të jenë në gjendje të garojnë në F1, pa u ndikuar nga data e lindjes. Mendoj se kjo ishte një vendim i drejtë”.

Antonelli debutoi në provat e lira në Çmimin e Madh të Italisë, duke regjistruar përkohësisht xhiron më të shpejtë para se të pësonte një aksident me shpejtësi të lartë pas 12 minutash. Pavarësisht dëmtimeve të konsiderueshme në makinë, ai doli nga aksidenti i padëmtuar.

Piloti debutues do të nisë testimet parasezonale së bashku me shokun e tij të skuadrës, George Russell, në Bahrein më 26 shkurt. Mercedes do të shpresojë që të dy të përmirësojnë paraqitjen e ekipit nga viti 2024, kur e mbylli kampionatin në vendin e katërt, rezultati më i keq në 12 vite.

Por, pavarësisht se si do të performojë Antonelli në sezonin e tij të parë, të paktën tani do të mund të drejtojë makinën nga aeroporti për në shtëpi.