Presidenti i Turqisë Recep Tayyip Erdogan, ka deklaruar se siguria e Evropës nuk mund të konceptohet pa përfshirjen e Turqisë, duke e cilësuar anëtarësimin në Bashkimin Evropian si një prioritet strategjik për vendin e tij.

“Turqia e konsideron procesin e anëtarësimit në BE si një objektiv strategjik, pasi është një pjesë e pandashme e Evropës,” tha Erdogan gjatë një iftari të organizuar me ambasadorët e huaj në Ankara.

Ai theksoi gjithashtu rëndësinë e Turqisë në arenën globale, duke argumentuar se po bëhet gjithnjë e më e pamundur që Evropa të funksionojë si një aktor global pa zënë Turqinë vendin që i takon.

Në vijim të fjalës së tij, presidenti turk paralajmëroi se Izraeli nuk do të arrijë stabilitetin e kërkuar pa krijimin e një shteti të pavarur palestinez, me kufij të përcaktuar sipas vitit 1967 dhe me integritet të plotë territorial.

“Sikur të mos mjaftonin thirrjet për aneksimin e Bregut Perëndimor, ministrat e qeverisë izraelite po luajnë me zjarrin përmes provokimeve që synojnë xhaminë Al-Aksa,” theksoi presidenti turk, duke shtuar se kjo është një “vijë e kuqe” për Turqinë.

Duke iu referuar iniciativës së tij të njohur “Bota është më e madhe se pesë”, Erdogan përsëriti domosdoshmërinë e reformimit të Këshillit të Sigurimit të OKB-së, duke kërkuar përfshirjen e një vendi islam me të drejtën e vetos.

“Të kesh një vend islam me të drejtën e vetos në Këshillin e Sigurimit të OKB-së nuk është më vetëm një nevojë, por një domosdoshmëri,” përfundoi ai.