Në Ambasadën e Kosovës në Hagë është hapur ekspozita fotografike në kuadër të projektit “Pasqyrimi i masakrave dhe krimeve tjera nga lufta e fundit 1998/99 në Kosovë përmes fotografisë”.

E organizuar nga Këshilli Koordinues i Asociacioneve Familjare të të Zhdukurve të Kosovës dhe “For New Life Kosovo”, ekspozita synoi njoftimin e opinionit publik për krimet serbe në Kosovë.

“Ekspozita ka për qëllim parësor ngritjen e vetëdijes ndërkombëtare për krimet e kryera gjatë luftës nga Serbia në Kosovë, me fokus në zbardhjen e fatit të personave të zhdukur me forcë gjatë luftës”, ka njoftuar ambasada në Hagë.

Ambasadori Dren Doli, Ambasadori i Shqipërisë Artur Kuko dhe Sekretari i Parë Arif Kaçandolli theksuan rolin kryesor të institucioneve shtetërore dhe mekanizmit gjyqësor për të trajtuar çështjen e personave të zhdukur me forcë, e cila paraqet një problem të përhershëm humanitar.

“Ngjarja hapëse ofroi mundësinë për të reflektuar në një atmosferë të përbashkët, për mizoritë dhe për të dëgjuar historitë e të mbijetuarve të masakrave, në mënyrë që kujtimi të përjetësohet me kalimin e kohës për të siguruar që këto akte dhune të mos përsëriten më. Nëpërmjet këtyre reflektimeve të tmerrshme, fotot shërbejnë si thirrje për drejtësi dhe llogaridhënie”, vazhdon njoftimi.