Kurti: Epopeja e UÇK-së shënoi kryengritje, solidarizim e vetëdijësim

Kryeministri i Kosovës, Albin Kurti pas homazheve në kompleksin “Adem Jashari” në Prekaz për nder të 27-vjetorit të Epopesë së UÇK-së, ka thënë se kjo ngjarje shënoi kryengritje, solidarizim e vetëdijësim.

“Epopeja e UÇK-së i dha një hov të pandalshëm kryengritjes së armatosur dhe luftës çlirimtare, shpërthyen demonstrata gjithëpopullore dhe solidaritet i paparë historikisht ndërmjet shqiptarëve në Ballkan, por edhe gjithandej në mërgatë. Njëkohësisht u vetëdijesua e ndërgjegjësua edhe publiku shqiptar e diplomacia botërore”, ka thënë Kurti.

Ai më tej duke përmendur figurat e familjes Jashari, tha se ata kanë vetëm ditëlindje, teksa rënia e tyre është vet Epopeja e UÇK-së.

“Tash ndonëse nuk e kemi kryekomandantin Adem Jashari, bacën Shaban e Hamzën dhe të gjithë të tjerët që u sakrifikuan para 27 vjetëve, e kemi bacën Rifat që do ta vizitojmë me shtëpinë plotë nipa e mbesa. Por mbi të gjitha e kemi Kosovën Republikë, me demokraci e zhvillim”, ka thënë tutje Kurti.

Konjufca: Jasharët na mësuan se liria nuk fitohet pa armë e pa dëshmorë 

Kryetari i Kuvendit, Glauk Konjufca ka thënë se krijimi dhe esenca e UÇK-së mbështetet te familja Jashari. Një deklaratë të tillë ai e bëri pas homazheve në Prekaz për nder të 27-vjetorit të Epopesë së UÇK-së.

“Ata si familje e kanë pasur të mishëruar në zemrat dhe shpirtin e tyre një të vërtetë, që e ka shpëtuar popullin e Kosovës. E kjo e vërtetë është se liria nuk fitohet pa armë në dorë dhe nuk fitohet pa i dhënë dëshmorët e vet”, ka thënë Konjufca.

Ai ka bërë homazhe bashkë me presidenten Vjosa Osmani, kryeministrin Albin Kurti dhe personalitete të tjera politike.

Osmani: Familja Jashari emblemë e UÇK-së, kullat e tyre – kala e lirisë

Krerët e shtetit kanë bërë homazhe në Kompleksin memorial “Adem Jashari” në Prekaz për nder të Epopesë së Ushtrisë Çlirimtare të Kosovës.

Presidentja Vjosa Osmani ka thënë se sakrifica e familjes Jashari është dritë udhërrëfyese për forcimin e Kosovës.

“Ata luftuan shumë më gjatë sesa vetëm përgjatë viteve të luftës, duke u shndërruar kështu në emblemë të UÇK-së si dhe duke i shndërruar kullat e Jasharëve në simbol të kalasë së lirisë, që edhe sot e mbron Kosovën, sovranitetin dhe pavarësinë. Nga këtu jo vetëm ne si breza që e përjetuam luftën, por edhe brezat e rinj, fëmijët tanë inspirohen për rrugën përpara për mbrojtjen e lirisë së arritur me sakrificë e gjak. Mbi të gjitha na përkujtohet të gjithëve se sa i lartë ka qenë çmimi për lirinë tonë”, ka thënë ajo.

Ajo ka përmendur se përveç figurës së Adem Jasharit, nuk duhet harruar fakti që dhjetëra gra e vajza janë flijuar nga po kjo familje, duke e bërë edhe më të shenjtë sakrificën e tyre.

“Kjo rrugë dhe sakrificë e tyre do të shërbej për secilin për ne si dritë udhërrëfyese për forcimin e Kosovës, e cila çdo ditë po bëhet më e fortë”, ka thënë presidentja.

Osmani, Kurti e Konjufca bëjnë homazhe në Prekaz

Krerët e shtetit kanë bërë homazhe në Kompleksin memorial “Adem Jashari” në Prekaz për nder të Epopesë së Ushtrisë Çlirimtare të Kosovës.

Presidentja Vjosa Osmani, kryeministri Albin Kurti, kryekuvendari Glauk Konjufca kanë vendosur buçeta me lule për 27-vjetorin e ngjarjes flijimin e familjes Jashari, duke u përjetësuar në historinë shqiptare.

Përveç tyre, homazhe bënë edhe personalitete të tjera të ekzekutivit dhe të qeverisjes lokale.