Autoritetet australiane kanë lëshuar urdhra evakuimi për qytetarët në panik pasi cikloni tropikal "Alfred" po afrohet më pranë brigjeve lindore të Australisë, transmeton Anadolu.

Shërbimi i Emergjencave Shtetërore të Uellsit të Ri Jugor u bëri thirrje banorëve në rajonin e lumenjve verior që të evakuohen pasi lumi po ngrihet me shpejtësi dhe reshjet masive priten të çojnë në përmbytje të mëdha.

Ndihmës komisarja Nicole Hogan nga komanda e Shërbimit Shtetëror të Emergjencave tha se 15 qendra evakuimi aktualisht janë të hapura në pjesën veriore të Uellsit të Ri Jugor.

Ajo tha se më shumë se 300 mijë thasë me rërë u janë shpërndarë anëtarëve të komunitetit për të përgatitur shtëpitë dhe bizneset e tyre për motin e ashpër që po vjen.

"Nëse qëndroni në zonë, mund të bllokoheni pa energji, ujë dhe shërbime të tjera thelbësore", tha Hogan.

Ajo paralajmëroi se mund të bëhet shumë e rrezikshme për shërbimet e urgjencës për të kryer operacione shpëtimi dhe se ndërtesat mund të mos i rezistojnë ndikimit të ujërave dhe përmbytjeve.

"Duhet të evakuoheni për të qëndruar me familjen, miqtë ose në një strehim alternativ në zonat e paprekura nga përmbytjet. Nëse nuk jeni në gjendje të gjeni strehim, qendrat e evakuimit janë të hapura në të gjithë rajonin", tha Hogan.

Banorët në juglindje të Queenslandit dhe në verilindje të Uellsit të ri Jugor po përgatiten për ciklonin, e cila thuhet se vjen me një ashpërsi që nuk është parë në rajon që nga viti 1974.

Cikloni "Alfred" pritet të qëndrojë "në skajin më të lartë" të kategorisë 2 dhe të zbresë në tokë mes mesnatës së së enjtes dhe orëve të para të mëngjesit të së premtes, duke reshje të dendura shiu dhe "dëmtim ndaj erërave shkatërruese" në zona të mëdha të Queenslandit dhe Uellsit të Ri Jugor.

Mbi 4 milionë banorë në Brisbane, Gold Coast, Sunshine Coast dhe qytete të tjera të Queenslandit dhe Uellsit të Ri Jugor janë vendosur në një paralajmërim zyrtar nga Byroja e Meteorologjisë.

Disa linja ajrore lokale pezulluan operacionet në Brisbane, aeroporti "Gold Coast" në Queenslandin jugor është mbyllur që nga e mërkura pasdite deri në një njoftim të mëtejshëm ndërsa aeroporti në Sunshine Coast vazhdon të funksionojë si zakonisht.

Edhe transporti publik mbetet i pezulluar.