Mançester Junajtid ka konfirmuar planet për t’u larguar nga “Old Trafford” dhe për të ndërtuar një stadium të ri 100,000 vendesh. “Djajtë” kanë kaluar 115 vitet e fundit në “Old Trafford”, i cili aktualisht mban rreth 74,000 spektatorë.

Stadiumi i tyre i ri pritet të ndërtohet në tokë në pronësi të klubit ngjitur me “Old Trafford”, me arkitektin Lord Norman Foster, i cili thotë se do të duhen pesë vjet për t’u ndërtuar. “Ky duhet të jetë një nga projektet më emocionuese në botë sot”, tha ai.

“Fillon me bërjen e diçkaje që është kaq intensive, të afron me fushën dhe nga ana akustike e përmirëson oshtimën. Kur largohesh nga stadiumi, nuk është si një kështjellë e rrethuar nga një det makinash, është i hapur. Ai mbahet nga një ombrellë që mbledh energjinë diellore, ujin e shiut, por është i mbrojtur. Ajo mbyll ndoshta hapësirën më të madhe publike në botë. Normalisht, një stadium kërkon 10 vjet për t’u ndërtuar, ne do ta bëjmë për pesë”.

Bashkëpronari i Junajtid, Xhim Retklif, tha se qëllimi është krijimi i një stadiumi ikonik futbolli. “‘Uembli’, ‘O2 Arena’, Fshati Olimpik – nuk do të jetë asgjë në shkallën e asaj që kemi parë në Londër në veri”, tha ai kur njoftoi planet e reja.

“Ky do të jetë i pari stadium i kësaj shkalle në veri të Anglisë”. Deri tani klubi ishte në dilemë nëse do të rizhvillonte stadiumin “Old Trafford” apo do të ndërtonte një stadium të ri, kostoja e të cilit shkon në 2 miliardë paund. Pas “Camp Nou”-t ai do të bëhet stadiumi i dytë më i madh në Europë.

Retklif e krahasoi stadiumin me Kullën Eifel, por shumë tifozë e quajtën një projekt të shëmtuar, i cili i ngjan një cirku.

Kryebashkiaku i Mançesterit, Endi Bërnhem, tha: “Mançester Junajtid mund dhe duhet të ketë stadiumin më të mirë të futbollit në botë. Për mua, kjo do të thotë një stadium që është i vërtetë me traditat e klubit, i përballueshëm për të gjithë, pa përjashtuar askënd dhe një stadium që vendos standarde të reja në këtë lojë, globalisht”.