Trajneri gjerman Thomas Tuchel ka zbuluar listën e tij të parë si trajner i kombëtares angleze, duke sjellë disa emra të rinj dhe rikthime të rëndësishme për ndeshjet e kualifikueseve të Kupës së Botës kundër Shqipërisë dhe Letonisë.

Një nga surprizat e mëdha të këtij grumbullimi është përfshirja për herë të parë e Dan Burn dhe Myles Lewis-Skelly. Mbrojtësi i Newcastle, Burn, është shpërblyer për paraqitjet e tij të qëndrueshme në Premier League, ndërsa talenti i Arsenalit, Lewis-Skelly, shihet si një perspektivë e madhe për të ardhmen.

Përveç emrave të rinj, skuadra e Anglisë ka parë edhe disa rikthime të rëndësishme. Marcus Rashford, i cili nuk ishte pjesë e listës në grumbullimet e fundit, është ftuar sërish nga Tuchel. Po ashtu, mesfushori me përvojë Jordan Henderson dhe mbrojtësi Reece James janë rikthyer.

Anglia do të përballet me Shqipërinë dhe Letoninë në kuadër të kualifikueseve për Kupën e Botës. Këto dy ndeshje janë një mundësi e shkëlqyer për Tuchelin që të testojë filozofinë e tij dhe të sjellë freski në skuadër.