Hirësi Joani, mitropoliti i Korçës, është zgjedhur kryepeshkopi i ri i Kishës Ortodokse Autoqefale të Shqipërisë. Sinodi i Shenjtë e zgjodhi atë pas Liturgjisë Hyjnore të Dielës së Dytë të Kreshmës, një ngjarje që u ndoq nga besimtarët, drejtuesit e mitropoliteve ortodokse të Shqipërisë dhe të ftuar të tjerë.

Ceremonia e marrjes së detyrës do të zhvillohet më 29 mars. Hirësi Joani u prit me një ceremoni të veçantë dhe hyri në Katedralen “Ngjallja e Krishtit”, ku kambanat e saj dhe ato të të gjitha kishave ortodokse në Shqipëri ranë njëkohësisht në nder të këtij momenti historik.

Ai do të pasojë në këtë detyrë Kryepeshkopin Anastas, i cili ndërroi jetë në janar të këtij viti. Në testamentin e tij, Anastas kishte shprehur dëshirën që Kisha Ortodokse Autoqefale e Shqipërisë të ketë një klerik shqiptar në krye.