Më 18 mars 1948 lindi në Bërzeshtë të Librazhdit Vilson Sami Blloshmi (1948-1977), poet i survejuar, i arrestuar në Librazhd më 5 gusht 1976 për “agjitacion dhe propagandë kundër pushtetit popullor”.

Vilson Blloshmi dhe Genc Leka u shpallën fajtorë më 13 qershor 1977, kur u dënuan me vdekje, pushkatim e konfiskim të pasurisë. Vendimi u la në fuqi si nga Gjykata e Lartë, ashtu edhe nga Presidiumi i Kuvendit Popullor dhe u zbatua mesnatën e 17 korrikut 1977, kur dy poetët u pushkatuan në afërsi të Librazhdit.

Më 1994, ditën e rivarrimit, Presidenti i Republikës i akordoi medaljen “Martir i Demokracisë”. Një vit më pas u dekorua me urdhrin “Mësues i Popullit” dhe një shkolle në Librazhd iu dha emri “Vilson Blloshmi”.

Më 30 qershor 2006, nën kujdesin e Ministrisë së Turizmit, Kulturës, Rinisë dhe Sporteve dhe në prani të Presidentit të Republikës, u përurua në Librazhd memoriali i dy poetëve, martirë të demokracisë – Genc Lekës dhe Vilson Blloshmit. Po këtë ditë ata u shpallën “Qytetar Nderi” të Bashkisë së Librazhdit.

Në janar 2009, Blloshmit iu dha postum çmimi “Lasgush Poradeci” për librin poetik më të mirë të vitit.

Në maj të vitit 2010, Presidenti i Republikës i akordoi urdhrin “Nderi i Kombit”.
Fotoja më poshtë është marrë nga blloku i Vilson Blloshmit, i ruajtur në dosjen e tij formulare nr. 261.

“Unë jetova. Unë nuk kam asgjë se u përkas të gjithëve, prandaj jam i lumtur..., prandaj vlerësoj më tepër se çdo gjë, të kundërtën”.