Papua Guinea e Re ka bllokuar hyrjen në rrjetin social Facebook, duke e cilësuar këtë veprim si “test për të kufizuar gjuhën e urrejtjes, dezinformimin dhe përmbajtjet e papërshtatshme”. Vendimi ka shkaktuar reagime të forta, veçanërisht nga opozita, e cila e konsideron atë shkelje të të drejtave të njeriut.

Ministri i Policisë, Peter Tsimalili Jr, ka mbrojtur ndalimin, duke theksuar se nuk synon të kufizojë lirinë e shprehjes, por të mbrojë qytetarët nga përmbajtjet e dëmshme. Megjithatë, ky vendim ka ngritur shqetësime serioze, veçanërisht për bizneset e vogla që mbështeten te Facebooku për aktivitetin e tyre ekonomik.

Neville Choi, kryetar i këshillit të medias, e ka quajtur këtë masë "”hap drejt autokracisë dhe abuzimit të të drejtave të njeriut”. Më tej, ai ka theksuar se disa agjenci shtetërore të teknologjisë dhe komunikimit nuk ishin në dijeni të këtij vendimi, pavarësisht pretendimeve të qeverisë se ndalimi po zbatohej në bashkëpunim me to.

Kritikat janë forcuar pas miratimit të një ligji të ri kundër terrorizmit, i cili i jep qeverisë kompetenca të gjera për të monitoruar dhe kufizuar komunikimet në internet. Deputeti opozitar Allan Bird ka paralajmëruar se bllokimi i Facebookut mund të jetë “vetëm hapi i parë” drejt kufizimeve më të mëdha.

Qeveria e Papua Guinesë së Re ka kërcënuar më parë me masa kundër Facebookut. Në vitin 2018, rrjeti social u bllokua për një muaj për të luftuar profilet e rreme, ndërsa në vitin 2023 nisi një hetim mbi ndikimin e medias sociale në vend.