Braktisja e koalicionit VLEN nga Arben Taravari dhe bashkimi me BDI-në në zgjedhjet lokale duket punë e kryer. Ministri i Shëndetësisë, Arben Taravari ka takuar sot kryetarin e BDI-së, Ali Ahmeti. Burime zyrtare nga BDI thonë për gazetën KOHA se takimi është realizuar në Shkup, në një restorant të njohur, ndërsa i njëjti ka zgjatur rreth një orë.

“Po, në mëngjes janë takuar drejtpërdrejtë dhe kanë biseduar gjerë e gjatë. Për më shumë informacione, ditëve në vijim pasi të definohet marrëveshja”, thonë zyrtarë të BDI-së, të cilët kanë njohuri për takimin.

Se do ta braktis VLEN-in, Taravari mbrëmë e tha në intervistë për emisionin 360° në RTVM, ndërsa u shpreh se ka komunikim me liderin e BDI-së, Ali Ahmeti, njëjtë sikurse kanë komunikim edhe partitë tjera që e përbëjnë koalicionin VLEN.

Taravari në intervistë ka thënë koalicioni me tri partitë shqiptare nuk funksionin si duhet, madje tha se qytetarët janë të pakënaqur me përfaqësimin e VLEN-it në Qeveri, ndërsa është bazuar në tri anketa, të cilët sipas tij, i ka bërë partia e tij.

“Unë mendoj se kemi shumë mangësi. Kjo nuk është aq për faj të kryeministrit Mickoski, sa për faj të nesh. Ekziston një mosmarrëveshje që duket nga 100 kilometra larg, se funksionojmë shumë ngadalë. E gjithë kjo është përshtypja e popullit, që është më e keqja për ne, se VLEN ka një pozicion shumë të dobët në Qeveri. Posa i bëra tre anketa, te shqiptarët përgjithësisht të anketuar. Përshtypja e rreth 70% të popullsisë shqiptare është se VLEN nuk funksionon si duhet, dhe se përfaqësimi i shqiptarëve në Qeveri nuk është i kënaqshëm“, thotë Taravari.