Lidhja e Sindikatave të Maqedonisë (LSM) nesër do të protestojë në rrugët e Shkupit. Protesta vjen pasi javën e kaluar Qeveria miratoi informacionin se paga minimale do të rritet për 1800 denarë neto, dhe sipas LSM-së, vendimi është i kundërligjshëm, transmeton Portalb.mk. 

Sipas kreut të LSM-së, Sllobodan Trendafilov, vendimi i Qeverisë që në mënyrë të njëanshme të miratojë informacionin, sipas të cilit është përcaktuar paga minimale, është në dëm të punëtorëve në Maqedoni dhe mospranimi i propozimeve për shumën. 

“Që nga konferenca e fundit për media janë intensifikuar sulmet ndaj LSM-së dhe sindikatave të tjera nga partitë politike dhe drejtorët e emëruar politikisht që marrin rroga nga pagesa e taksave tona. Ne i paguajmë që të luftojnë ashpër me kërcënime dhe shantazhe, shkarkime dhe shkurtime të pagave të aktivistëve tanë, për të krijuar një sindikatë tjetër përfaqësuese në dëm të punëtorëve”, tha kryetari i LSM-së në një konferencë për media javën e kaluar si dhe apeloi për mbështetje të LSM-së nga punëtorët. 

Trendafilov theksoi se ata nuk janë këtu për të rrëzuar qeverinë, por për të rritur rrogat e tyre që të mund të jetojnë me dinjitet. 

Ndaj kësaj kanë reaguar nga VMRO-DPMNE, ata thonë se ” sindikalistët e baterive, të udhëhequr nga Trendafilov, marrin mbi një milion denarë në vit paga dhe kompensime”.”Sindikalistët e rremë që drejtojnë LSM-në po pasurohen nga vuajtjet e punëtorëve. Prandaj, punëtorët që janë anëtarë të LSM-së janë thellësisht të zhgënjyer me udhëheqjen e drejtuar nga Trendafilov. Zhgënjimi i anëtarëve të LSM-së me udhëheqjen aktuale është se ata vetë e kanë kthyer LSM-në në një kompani private”, thanë nga VMRO-DPMNE.

Qeveria vendosi që paga minimale për vitin 2025 të rritet për 2.685 denarë bruto, ose për 1.812 denarë neto. Paraprakisht sindikatat dolën me propozim për përcaktimin e pagës minimale në përputhje me ligjin, por edhe marrjen e vendimit me të cilin do të rritet paga minimale për 6.000 denarë shtesë.