Në koalicionin VLEN nuk është diskutuar ndarja e komunave përmes numrave apo përqindjeve. Nuk ka kërkesa e as ultimatume thonë nga koalicioni VLEN për Alsat. Në prag të zgjedhjeve lokale të tetorit, në VLEN po analizohen të gjitha anketat, argumentet pro dhe kundër, anët pozitive dhe negative për çdo subjekt politik në çdo komunë ku kjo parti planifikon të del me kandidat për kryetar komune. Nuk përjashtohet mundësia që të përkrahin edhe kandidatë të pavarur në komuna të caktuara.

“Subjektet e VLEN-it në asnjë moment nuk kanë biseduar për numra e për komuna. Pra është qëndrim i qartë që listat do të jenë të përbashkëta, kandidatët do të jenë të përbashkët, platforma, programi, gjithçka do të jetë e përbashkët. Madje brenda VLEN-it kemi vendosur që në disa komuna, nëse ka nevojë dhe e shohim që ka kandidatë jashtë VLEN-it e që është më i miri dhe ka më tepër përkrahje nga ai vendbanim, ne do të dalim edhe jashtë VLEN-it. Pra VLEN do të përkrahë edhe kandidatë të pavarur. Në asnjë moment nuk ka pasur debat se kush sa komuna do t’i marrë për shkak se të gjithë kandidatët në fund do të jenë të VLEN-it, pra të përbashkët”, thonë nga VLEN.

VLEN do të japë kontributin e saj edhe në qytetin e Shkupit. Siç njoftojnë për Alsat, vëmendje të veçantë do të ketë qoftë me kandidatë, qoftë me listë për këshilltarë por edhe me program. Ndryshimet në Shkup janë të pa shmangshme thonë nga VLEN. Kreu i Çairit, Visar Ganiu, së fundmi në intervistë për Alsat, bëri të ditur se VLEN në asnjë komunë nuk do të bashkëpunojë me ASH-në e Taravarit, nëse kjo e fundit garon me lista të veçanta. /Alsat.mk