Interi luan për ëndrrën “tripletë”, ndërsa Milani për të shpëtuar sezonin. Sot në mbrëmje është një sfidë e rëndësishme që mund të përcaktojë shumë mbi fatet e sezonit për të dyja skuadrat. Gjysmëfinalja e kthimit, pasi ajo e para ka përfunduar në barazim 1-1 është e gjitha për t’u shijuar.

Zikaltrit duan fitoren e parë sezonale, me anë të së cilës duan të kapin finalen e Kupës. Milani kërkon Europën, pikërisht nga ky kompeticion, sepse nga kampionati është e vështirë.

* Interi dhe Milani do të sfidohen për herë të 29-të në Kupën e Italisë. Bilanci është në favor të kuqezinjve, që kanë marrë 10 fitore kundër 10 të zikaltërve dhe 9 ndeshje kanë përfunduar në barazim për të plotësuar bilancin. Kjo është hera e tretë që dy formacionet do të përballen në gjysmëfinalen e këtij kompeticioni pas sezonit 1985 ku u kualifikua Milani dhe në vitin 2022 ku u kualifikua Interi.

* Në 243 sfida mes Interit dhe të Milanit në të gjitha kompeticionet, vetëm në një rast dy ekipet kanë shkuar përtej kohës shtesë, pikërisht në Kupën e Italisë më 27 dhjetor 2017. Në atë rast, kuqezinjtë përfituan duke fituar 1- 0 ndaj zikaltërve falë golit të Patrik Kutrones (104’) në pjesën e parë të shtesës.

* Pasi ka fituar vetëm një në 8 sfidat e luajtura në shtëpi kundër Milanit në Kupën e Italisë (3 barazime dhe 4 humbje), Interi ka qëndruar i pamposhtur në secilën prej 5 ndeshjeve të luajtura në shtëpi kundër Milanit në këtë kompeticion, duke marrë 4 fitore dhe 1 barazim.

* Pas dy barazimeve në 2 sfidat e fundit në të gjitha kompeticionet (1-1 në Serinë A dhe tjetrin në Kupën e Italisë), Interi dhe Milani mund të barazojnë 3 derbi radhazi për herë të parë që nga sezoni 1967-1968.

* Pas një serie me 6 humbje radhazi, Milani është i pamposhtur në 4 ndeshjet e sezonit kundër Interit në sezonin 2024-2025 në të gjitha kompeticionet, duke fituar 2 dhe duke barazuar 2. Mund të arrijë 5 ndeshje pa humbje, për herë të dytë në 30 sezonet e fundit, ndërkohë që gjatë viteve 2002-2005 arriti 10 ndeshje pa humbje, me 7 fitore dhe 3 barazime.

* Interi (15 deri tani) mund të jetë skuadra e tretë që arrin më shumë herë Kupën e Italisë pas Juventusit që ka 22 dhe Romës që ka 16. Milani ka 12 finale, po aq sa Fiorentina.

* Zikaltrit kanë fituar 9 ndeshje në shtëpi në të gjitha kompeticionet dhe nuk bëjnë më mirë se kaq përpara tifozëve të tyre nga periudha tetor 2021-janar 2022, 10 në atë rast. Ishin pikërisht kuqezinjtë që i prishën ecurinë pozitive, duke fituar 2-1 me dopietën e Zhirusë.

* Duke nisur nga faza e 1/ 8-tave në Kupën e Italisë, Milani është skuadra që ka realizuar më shumë gola (10, dyfishin e zikaltërve). Në tërësi, formacioni kuqezi ka përqindjen më të lartë në kompeticion, ndërsa Interi është në vendin e gjashtë.

* Lautaro Martinez ka shënuar 10 gola në 19 ndeshje kundër Milanit në të gjitha kompeticionet dhe mund të bëhet lojtari i shtatë që arrin në numër dyshifror në derbi pas Shevçenkos, Meacës, Nordahl, Niers, Ibrahimoviç dhe Kandiani.

* Tami Abraham ka shënuar në 2 nga 3 ndeshjet e luajtura kundër Interit në të gjitha kompeticionet duke përfshirë edhe gjysmëfinalen e parë. Hera e fundit që një lojtar i Milanit ka shënuar në 2 sfida radhazi në Kupën e Italisë kundër zikaltërve, ka qenë Shevçenko në sezonin 1999-2000.

GENTJAN ALINANI-PANORAMASPORT.AL