Shërbimi i mbrojtjes civile në Rripin e Gazës njoftoi sot në mëngjes për vdekjen e gjashtë personave, mes tyre dy të mitur, nga sulmet ajrore izraelite gjatë natës në pjesën qendrore dhe jugore të këtij territori palestinez të rrethuar, ku Izraeli po intensifikon ofensivën e tij.

“Ekipet tona transportuan të paktën 6 të vdekur,” deklaroi për Agjencinë Franceze të Lajmeve Mahmoud Basal, zëdhënës i këtij shërbimi të ndihmës së parë.

Sipas tij, “katër të vdekur” – një çift dhe dy fëmijë të mitur të së njëjtës familje – si dhe “dhjetëra të plagosur” u transportuan në spitale pas një sulmi ajror që ndodhi rreth orës 01:30 pas mesnate në një banesë në lagjen Amal të Khan Younis, në jug të territorit palestinez.

Basal shtoi gjithashtu se kishte “dy të vdekur dhe disa të plagosur, përfshirë fëmijë”, nga një tjetër sulm që ndodhi gjysmë ore më vonë në një banesë në kampin e refugjatëve palestinezë në Nuseirat, në qendër të Rripit të Gazës.

I pyetur nga Agjencia Franceze e Lajmeve, ushtria izraelite deklaroi se nuk është në gjendje të komentojë, përveç nëse i jepen “koordinatat gjeografike të sakta” të këtyre goditjeve.

Agjencia Franceze e Lajmeve nuk ishte në gjendje të konfirmojë informacionin e Basalit nga burime të pavarura.