Kryetarja e Shkupit, Danela Arsovska, ka paralajmëruar sot në mëngjes një plan për destabilizimin e qytetit, që sipas saj ka për qëllim krijimin e kaosit dhe largimin e vëmendjes nga çështjet reale.

Në një postim të sajin të fundit, Arsovska deklaroi:

“Miliarda euro biznes po destabilizohen. Ganiu, Mexhiti dhe Ademi janë ata që po përjetojnë presionet më të mëdha. Sot më informuan se po përgatitet një plan për destabilizimin e Shkupit, duke filluar me ndërmarrjen e transportit publik (JSP), më pas me Ndërmarrjen Komunale të Higjienës, me qëllim krijimin e kaosit për të shpërqendruar dhe për të mbajtur kontrollin.”

Ajo paralajmëron se zhvillime të tilla pritet të ndodhin që nga sot, dhe thekson se koalicioni i biznesit me Ganiun, Mexhitin dhe Ademin nuk duhet të lejojë të dëmtohet, duke ironizuar Mickoskin dhe VMRO-DPMNE-në.

Në një foto të shpërndarë prej saj, shihet i ashtuquajturi “element destabilizues”, që sipas Arsovskës qëndron pas këtyre planeve. Në foto shfaqen Mexhiti, Siljanovska dhe Mickoski, së bashku me ambasadoren amerikane, në një aktivitet të NATO-s të mbajtur këto ditë.