Trajneri i Manchester Unitedit, Ruben Amorim pritet të marrë një vendim të madh sa i përket të ardhmes së katër prej yjeve kryesore të skuadrës, duke ua treguar derën e largimit nga ‘Old Trafford’.

Sipas mediumit The Sun, Amorim do t’i lërë Alejandro Garnachon, Marcus Rashfordin, Antonyn dhe Jadon Sanchon jashtë skuadrës së United për turneun parasezonal në SHBA.

Trajneri kryesor është i vendosur të sigurojë që këta katër lojtarë të mbeten të përjashtuar dhe inkurajohen të gjejnë klube të reja.

“Amorim po e vendos autoritetin e tij në klub. Ishte e vështirë të arrinte në mes të sezonit, por tani ai ka mundësinë ta formësojë ekipin sipas imazhit të tij. Dhe nuk po humb kohë”, ka thënë fillimisht një burim brenda klubit.

“Ai dëshiron vetëm lojtarë që do të vdisnin për fanellën dhe që i mbështesin idetë e tij”.

“Ai gjithashtu dëshiron një skuadër më të vogël për të krijuar një lidhje të ngushtë ekipore në mënyrë që të gjithë të kenë kohë të mjaftueshme loje për të qenë në formën maksimale kur të thirren. Ai nuk dëshiron asnjë problem apo shpërqendrim”, shtoi burimi.

Garnacho është i vetmi lojtar i kësaj katërsheje që nuk u huazua sezonin e kaluar. Pavarësisht kësaj, ai përsëri nuk u pranua nga Amorim, i cili thuhet se i tha të gjente një klub të ri para shokëve të ekipit.