Një granatë ka shpërthyer mbrëmë në rezidencën e ambasadorit norvegjez në Tel-Aviv, deklaroi ministri izraelit i Punëve të Jashtme, Gideon Saar, duke shtuar se askush nuk është lënduar. 

“Sapo fola me ambasadorin norvegjez në Izrael, Per Egil Selvag, në oborrin e të cilit sonte u hodh një granatë”, ka shkruar Saar në rrjetin social “X”. “E dënoj fuqishëm këtë krim serioz dhe të rrezikshëm”, shtoi ai. 

Në njoftimin e Ministrisë së Punëve të Jashtme të Norvegjisë thuhet se ata kanë kontaktuar me ambasadën dhe se nuk është lënduar asnjë personel diplomatik në incident.

Policia izraelite njoftoi se kishte nisur një hetim për incidentin, i cili shkaktoi “dëme të vogla materiale”.

Ndërkohë, për shkak të konfliktit të vazhdueshëm midis Izraelit dhe Iranit, Çekia përkohësisht po e mbyll ambasadën e saj në Teheran, raporton Radio Praga. Vendimi u mor nga ministri i Punëve të Jashtme, Jan Lipavski. Është vendosur një numër telefoni për qytetarët çekë në Republikën Islamike që kanë nevojë për shërbime urgjente konsullore.

Ministrja australiane e Punëve të Jashtme, Peni Uong, deklaroi se ambasada e vendit në Teheran është mbyllur për shkak të përkeqësimit të situatës së sigurisë në Iran. Ambasadori i Australisë në Iran do të shkojë në Azerbajxhan për të ndihmuar qeverinë në përgjigjen ndaj krizës.