Me ribalancimin e fundit të buxhetit, Qeveria e Maqedonisë së Veriut planifikon të shpenzojë më shumë para, por njëkohësisht edhe të mbledhë më shumë të ardhura. Buxheti do të zgjerohet me afro 57 milionë euro më shumë se sa ai rekord që u miratua në fund të vitit të kaluar. Megjithatë, parashikimet janë që edhe të hyrat do të rriten në përpjesëtim të ngjashëm, çka pritet të ruajë deficiti buxhetor në nivelin e mëparshëm prej 4% të BPV-së, përkatësisht 670 milionë euro, informon PressOnline.al

Rritje do të ketë edhe te inflacioni, nga 2.2% në 2.8%, por kjo mbetet më e ulët se niveli aktual prej 3.3%. Ministrja e Financave, Gordana Dimitrieska Koçoska, tha se po ndërmerren masa për të ulur këtë normë inflacioni, duke nxitur konkurrencën në prodhimin vendor përmes masave që nuk janë domosdoshmërisht ndihma financiare direkte.

Një rritje e ndjeshme do të ketë edhe te shpenzimet kapitale, të cilat shtohen me rreth 5 milionë euro për shkak të projekteve në fushën e mbrojtjes. Rreth 40 milionë euro më shumë do të shkojnë për fondin pensional, duke e çuar shumën totale të transferimeve nga buxheti në këtë drejtim në 813 milionë euro.

Pensionistët do të marrin rritjen ligjore të pensioneve, por ende nuk është vendosur nëse do të përfitojnë edhe rritjen lineare deri në 2.500 denarë. Rritje pritet edhe në pagat e sektorit publik, veçanërisht në MPB, për shkak të rritjes së pagave me 10% për rreth 12.000 të punësuar.

Ndërkohë, borxhi i brendshëm dhe i jashtëm do të vazhdojë, por Koçoska garanton se borxhi publik nuk do ta kalojë 62% të BPV-së. Projeksioni për rritjen ekonomike mbetet 3.7%, e udhëhequr kryesisht nga konsumi.(PressOnline.al)