Arben Taravari, lideri i krahut të ndarë të Aleancës për Shqiptarët, ka bërë të ditur se nuk do të kandidojë për kryetar të Komunës së Gostivarit në zgjedhjet e ardhshme lokale. Në një tubim me qytetarët e mbajtur mbrëmë në kuadër të fushatës “Takohemi në Gostivar”, Taravari konfirmoi se kandidati për një mandat të ri do të jetë Valbon Limani, aktualisht ushtrues detyre i kryetarit të komunës.

Në fjalimin e mbajtur në Qendrën për Kulturë “ASNOM”, Taravari u shpreh i bindur në mbështetjen që Limani gëzon në qytet, duke i dhënë fund spekulimeve rreth kandidaturës.

“Po ju them nga këtu: Valbon Limani nuk është vetëm kandidat, por ai do të jetë kryetari i ardhshëm i Gostivarit,” deklaroi Taravari, duke kritikuar zërat që, sipas tij, përpiqen ta pengojnë Limanin.