“I bëj thirrje të bëjmë ndryshime kushtetuese, të fshihet nga Kushtetuta shprehja përçmuese ‘20 për qind’ dhe të zëvendësohet me ‘gjuha shqipe’ dhe ‘etnia shqiptare’, me çka njëherë e përgjithmonë do të kemi një regjistrim të përshtatshëm”, tha Rexhepi, ndërsa shtoi se vendimi i Gjykatës Kushtetuese ishte në pjesën më të madhe juridik, por edhe politik

 Koalicioni “Fronti Evropian” e cilësoi vendimin e Gjykatës Kushtetuese lidhur me Metodologjinë e regjistrimit si një sukses të madh. Deputeti Skender Rexhepi, në konferencën për shtyp të mbajtur dje në Parlament theksoi se ky vendim i fundit për Regjistrimin është veçanërisht i rëndësishëm për ata që përkohësisht jetojnë jashtë shtetit, dhe siç theksoi ai, janë të përjashtuar nga çdo përfitim i shtetit, shkruan gazeta KOHA.

“Regjistrimi vetëm në Maqedoni nga e gjithë Evropa është me karakter politik – këtë e tha edhe vetë kryeministri, si të kishte zbuluar ujin e ngrohtë – duke pasur parasysh se edhe kryeministri edhe të gjithë faktorët politikë janë të vetëdijshëm se te ne regjistrimi ka karakter politik dhe nuk është një operacion statistikor, sepse të drejtat e një etnie, konkretisht shqiptarëve, varen nga përqindja e parashikuar në Kushtetutë, gjë që është plotësisht normale të shihet politikisht”.

Për këtë arsye, tha Rexhepi, nëse kryeministri dhe pushteti dhe të gjithë aktorët politikë duan që një herë e përgjithmonë të kemi një Regjistrim që do të jetë statistikor, për mbikëqyrjen e zhvillimit ekonomik dhe social të shtetit, duhet të bëhen ndryshime kushtetuese. “I bëj thirrje të bëjmë ndryshime kushtetuese, të fshihet nga Kushtetuta shprehja përçmuese ‘20 për qind’ dhe të zëvendësohet me ‘gjuha shqipe’ dhe ‘etnia shqiptare’, me çka njëherë e përgjithmonë do të kemi një regjistrim të përshtatshëm”, vlerësoi ai, ndërsa shtoi se vendimi i Gjykatës Kushtetuese ishte në pjesën më të madhe juridik, por edhe politik.

“Vendimi i Gjykatës Kushtetuese është për t’u përshëndetur, sepse pjesa më e madhe e tij është juridik, por një pjesë është edhe politik, nëse e marrim parasysh deklaratën ku u tha se nuk ka efekt prapaveprues, gjë që për ne është politike, sepse gjatë këtij viti janë marrë vendime të caktuara për miratimin e buxheteve të komunave në të cilat qytetarët nga diaspora janë përjashtuar plotësisht. Pse është bërë kjo, vetëm pushteti e di – nuk ka qenë e parashikuar as me ligj – por sipas të gjitha dispozitave demokratike, në buxhete duhet të parashihen edhe ata që studiojnë jashtë apo punojnë përkohësisht jashtë shtetit, sepse ata duhet të gëzojnë të njëjtat të drejta siç kanë edhe përgjegjësi”, theksoi Rexhepi.

Për këtë arsye, tha ai, do të kërkojnë përgjegjësi politike dhe penale, si dhe kthimin e mjeteve që deri tani i janë mohuar komunave. “Prandaj do të kërkojmë përgjegjësi politike dhe penale për shkak të neglizhencës për mundësinë që të gjitha komunat të përfshihen në buxhetin duke përfshirë të gjithë qytetarët. Për përjashtimin e atyre që nuk janë parashikuar në buxhetin e komunave, do të kërkojmë nga prokuroria të ngrejë përgjegjësi ndaj tyre dhe ata duhet sa më shpejt të kthejnë mjetet që nuk janë dhënë për komunat”, tha Rexhepi.