Presidenti amerikan Donald Trump vizitoi të marten një qendër të re ndalimi për migrantët e paligjshëm, të ndërtuar në zemër të kënetave të Floridës, e njohur tashmë si “Alcatrazi i Aligatorëve”. Qendra pritet të mbajë deri në 3,000 persona, ndërsa një tjetër objekt i ngjashëm do të ndërtohet pranë Jacksonville.

Gjatë një turi në ambientet e brendshme, Trump e përshkroi objektin si një model për masa të ashpra ndaj imigracionit të paligjshëm, duke deklaruar se aty do të mbahen “emigrantët më të rrezikshëm, disa nga njerëzit më të egër në planet.”

Trump i cili shoqëroher nga Sekretarja e Sigurisë Kombëtare Kristi Noem dhe Guvernatori i Floridës Ron De Santis sqaroi se alligatoret, krokodilët dhe gjarpërinjtë që ndodhen në kënetat përreth do të shërbejnë si pengesë për çdo përpjekje për arratisje. “E vetmja rrugëdalje është deportimi,” tha presidenti.

Teksa shihte ambientet e kësaj qendre ndalimi,  Trump nuk nguroi të sulmonte as rivalët e tij politik. Kreu I Shtëpisë së Bardhë u shpreh se Joe Biden do donte ta kishte parë Trump të burgosur në këtë qendër.

Vizita e Trump ne qendren e ndalimit te emigranteve solli protesta nga banoret e zones dhe ambientalistet te cilet shprehen shqetesimet e tyre per demet qe mund te shkaktohen ne ekosistemin e Everglades.

Guvernatori i Floridës, Ron DeSantis, tha se do të angazhojë pjesëtarë të Gardës Kombëtare të Floridës si “gjyqtarë imigracioni” për të përshpejtuar proceset e dëbimit. Sekretarja e Sigurisë Kombëtare, Kristi Noem, shtoi se migrantët do të marrin “proces të rregullt ligjor” dhe më pas do të “kthehen menjëherë në vendet e tyre”. Sipas të dhënave të fundit, SHBA-ja po përballet me mbipopullim të qendrave të ndalimit, me rreth 59,000 persona në paraburgim, shifër që tejkalon kapacitetin zyrtar me 140%.

Në përfundim të vizitës, Trump deklaroi se kjo qendër mund të shërbejë si model për të tjera shtete republikane, si Luiziana, ku janë duke u kërkuar vende të tjera të përshtatshme për objekte të ngjashme. / abcnews.al