Sipërmarrësi vizionar Gjergj Luca nuk u mjaftua vetëm me pjesëmarrjen në tryezën e dialogut për Bujqësinë dhe Zhvillimin Rural të zhvilluar në Cërrik, ai doli me një zotim konkret dhe të matshëm që vendos në qendër prodhuesin vendas dhe konsumatorin shqiptar.
“Lajmi i mirë i kësaj mbrëmjeje është për prodhuesit dhe për konsumatorët: Duke filluar nga data 15 korrik 2025, në të gjitha restorantet Rozafa, 90% e verërave që do të ofrohen do të jenë prodhime ‘Made in Albania’,” u shpreh ai me vendosmërinë e dikujt që e sheh suksesin ekonomik përmes rrënjëve të vendit të vet.

Ky angazhim i rrjetit Rozafa nuk është thjesht një zgjedhje gastronomike, por një akt ekonomik me ndikim strategjik: Ai synon të krijojë një zinxhir vlerash ku produktet bujqësore dhe agrobiznesi shqiptare nuk mbeten thjesht mallra të tregut lokal, por shndërrohen në simbol të identitetit të shërbimit dhe konsumit cilësor në vend.
Nisma përforcon një vizion të qartë: Mbështetja ndaj prodhimit vendas duhet të fillojë aty ku produkti takohet me konsumatorin, në tryezë. Kjo do të krijojë kushte për një rritje të qëndrueshme të sipërmarrjes rurale, përmirësimin e kushteve të fermerëve dhe verëtarëve vendas, si dhe për gjenerimin e të ardhurave të reja në ekonominë rurale, e cila shpesh është lënë në hije.
Diskutimet e zhvilluara në këtë tryezë nxorën në pah një sërë problematikash që rëndojnë mbi sektorin bujqësor dhe agroturizmin, nga çështjet e aksesit në treg, tek mungesa e infrastrukturës dhe nevoja për lehtësira fiskale. Por mes sfidave, u dëgjua edhe një premtim: Kryeministri u zotua se bujqësia dhe zhvillimi rural do të jenë një ndër prioritetet themelore të qeverisjes së tij.
Ky takim nuk ishte një thjesht forum fjalësh, por një pikë kthese, ku angazhimi i sektorit privat, në krye me emra si Gjergj Luca, bashkohet me vullnetin institucional për të çliruar potencialin e madh të prodhimit vendas, duke e kthyer atë në motor zhvillimi dhe krenarie kombëtare.
AV