Tenderi për blerjen e terapisë me insulinë ka përfunduar dhe kontratat janë nënshkruar pothuajse dy muaj më parë. Në këtë moment nuk kemi sasi të disponueshme për pacientët e sapo vendosur në terapi moderne antidiabetike. Ndihemi plotësisht të gënjyer dhe të mashtruar. Kështu ka reaguar Lidhja e Shoqatave të Diabetikëve në Maqedoninë e Veriut, transmeton Portalb.mk.  

“Sasitë e produkteve të insulinës në farmacitë e insulinës janë reduktuar në minimum, duke mos ofruar kështu parakushtet për të përmbushur nevojat e pacientëve ekzistues. Duke folur për pacientët ekzistues, ne, si shoqatë, morëm informacion nga njëri prej endokrinologëve që punon në qendrat e diabetit se komisioni i diabetit do të fillojë të rishikojë terapinë ekzistuese. Atyre iu tha se të gjithë pacientëve ekzistues me terapi moderne do t’u rishikohet ajo. A do të thotë ky rishikim që nëse komisioni vendos që një pacient nuk duhet të jetë më në terapinë e përshkruar nga endokrinologu i tij kryesor, ai do të ndryshohet, ose do të transferohet në një terapi tjetër?”, pyesin nga Lidhja e Shoqatave të Diabetikëve në Maqedoninë e Veriut 

Ata janë gjithashtu të indinjuar sepse kriteret për zgjedhjen e shiritave, lancetave, glukometrave dhe sensorëve janë ulur në çmimin më të ulët të ofruar. 

“Për asnjë sëmundje tjetër, për asnjë terapi tjetër, nuk ka asnjë komision që është miratuar me ligj (përjashtojmë sëmundjet e rralla këtu) dhe në këtë mënyrë ne, si pacientë, jemi në disavantazh krahasuar me të gjithë pacientët e tjerë, pyesni veten pse? Sepse së pari duhet të ekzaminohemi nga endokrinologët tanë familjarë dhe pastaj të shkojmë për një ekzaminim nga komisioni / ose të presim që komisioni të vlerësojë dokumentacionin tonë për terapi të caktuara moderne. Në këtë mënyrë, ne ndihemi si pacientë/qytetarë të dorës së dytë”, thuhet në reagimin e tyre. 

Nga Lidhja e shoqatave, apelojnë ministrin e Shëndetësisë për mirëkuptim dhe ndërgjegjësim. 

“Askush prej nesh, 40,000 mijë pacientëve, nuk vendoset në terapi nëse nuk ka pasur nevojë mjekësore për të dhe asnjë terapi nuk përshkruhet nga një mjek që nuk është i trajnuar për të ofruar terapinë që na nevojitet. Ne kërkojmë urgjentisht një ndryshim në kompetencat ligjore të komisionit nacional të diabetit, sepse ato aktuale vendosen mbi sistemin tonë të kujdesit shëndetësor dhe janë në konflikt të drejtpërdrejtë me kompetencat profesionale të mjekëve që tashmë janë të autorizuar të përshkruajnë terapinë që ne pacientët me diabet kemi nevojë, dhe që nuk janë anëtarë të komisionit”, thuhet në letrën e diabetikëve. 

Prandaj, ata kërkojnë urgjentisht që sasi të reja të terapisë moderne të dorëzohen në farmacitë e insulinës, dhe që sistemi të zhbllokohet në mënyrë që të mund të iniciohen pacientë të rinj. 

“Ne kërkojmë urgjentisht që tenderi për glukometra, shirita, lanceta dhe sensorë të shpallet në përputhje me kriteret që do të jenë të pranueshme për ne pacientët. Ne apelojmë dhe jemi gati për një rishikim, por të bëhet një rishikim i vitit 2015, 2014, kur Komisioni i Diabetit në atë kohë, imagjinoni me të njëjtin anëtar që tani është president, dha miratimin për importet paralele, dha udhëzime për transferimin administrativ të pacientëve nga një terapi në tjetrën dhe kontribuoi në përkeqësimin e shëndetit të pacientëve tanë dhe ne si pacientë nuk mund ta harrojmë këtë”, thuhet në reagim. 

Nëse ky apel nuk merret parasysh nga ministria kompetente, Lidhja e Shoqatave të Diabetikëve do të organizojë protestë para Ministrisë së Shëndetësisë dhe para Qeverisë. 

“Nuk do të pranojmë më që ne, të vetmit pacientë me diabet, të trajtohemi si pacientë për të cilët shpenzohen më shumë para, si pacientë që duhet t’u kufizohen të drejtat e fituara tashmë, si pacientë që u trajtuan nga disa mjekë joprofesionalë dhe tani terapia jonë duhet të rishikohet nga një komision, si pacientë që duhet t’u jepen glukometrat më të lirë. Nuk do të pranojmë që askush të na vërë në një pozicion për të qenë qytetarë të dorës së dytë”, theksohet tutje në reagim. 

Kujtojmë se, Shoqatat e diabetikëve që nga ardhja në funksion të ministrit të ri të Shëndetësisë e kanë kujtuar atë se kanë nevojë urgjentisht për transparencë dhe përgjigje për reduktimet e paarsyetuara të barnave, zëvendësimet e tyre dhe vonesat në përmbushjen e kontratave të reja për terapi.

Sipas edicionit të fundit, të 11-të të “Atlasi për Diabet” të Federatës Ndërkombëtare të Diabetit (IDF), në Maqedoni në vitin 2024, janë regjistruar 140.800 persona me diabet të moshës 20 deri në 79 vjeç, që paraqet prevalencë të standardizuar sipas moshës prej 7,4 për qind. Të dhënat tregojnë gjithashtu se rreth një e treta e njerëzve me diabet – 33.5 për qind – janë të padiagnostikuar, që do të thotë se rreth 45,000 njerëz në vend jetojnë me diabet pa e ditur,