Pavarësisht hyrjes në fuqi të Aktit të Shërbimeve Dixhitale (DSA) në fund të vitit 2023, gjysma e shteteve anëtare të Bashkimit Europian ende nuk kanë ngritur organet zyrtare të sinjalizimit të përmbajtjes së paligjshme në internet.

Sipas një përmbledhjeje të publikuar nga Komisioni Europian, vetëm 13 nga 27 vendet e BE-së – përfshirë Gjermaninë, Francën dhe Italinë – kanë krijuar strukturat përkatëse për të certifikuar të ashtuquajturit “sinjalizues të besuar” (trusted flaggers), një komponent kyç i DSA-së në luftën kundër përmbajtjes si gjuha e urrejtjes apo materiali terrorist.

DSA-ja detyron platformat online të përmbushin kërkesa të rrepta për transparencë dhe moderim përmbajtjeje, përfshirë vendosjen e mekanizmave efikasë që i lejojnë përdoruesit të raportojnë përmbajtje të paligjshme. Platformat janë gjithashtu të detyruara t’u japin përparësi sinjalizimeve që vijnë nga sinjalizuesit e besuar, të cilët miratohen nga autoritetet kombëtare mbikëqyrëse.

Shtetet anëtare duhej të kishin emëruar një mbikëqyrës kombëtar deri në shkurt të vitit 2024, por vonesat në këtë proces po ngadalësojnë funksionimin efektiv të sistemit. Komisioni Evropian ka nisur përgatitjen e udhëzimeve të reja për të ndihmuar shtetet dhe për të sqaruar se si duhet të trajtohen rastet kur organizatat keqpërdorin statusin e sinjalizuesit të besuar. Këto udhëzime pritet të publikohen përpara fundit të vitit.

Ndërkohë, Komisioni po zhvillon hetime ndaj disa platformave të mëdha – përfshirë X, TikTok dhe Aliexpress – për shkelje të mundshme të DSA-së, edhe pse asnjë prej tyre nuk është finalizuar deri më tani. Ekzekutivi i BE-së ka paralajmëruar se do të rrisë përpjekjet për ndërgjegjësim dhe mbështetje për sinjalizuesit, me qëllim përmirësimin e zbatimit të legjislacionit në mbarë bllokun.