Me sy të përlotur, Angel Di Maria është prezantuar si blerja e fundit nga skuadra argjentinase Rosario Central, 18 vjet pasi u largua nga klubi i fëmijërisë.
Di Maria, që ndihmoi Argjentinën të fitonte Kupën e Botës 2022, gjithnjë ka dashur të kthehet në Rosario. Por ai mori kërcënime me vdekje nga bandat e trafikantëve të drogës.
300 kilometra larg Buenos Airesit, Rosario është një qendër e krimit të dhunshëm dhe përplasjeve midis grupeve që kërkojnë të monopolizojnë tregtinë e drogës.
“Të kthehem në shtëpi pas kaq shumë kohësh është diçka shumë e veçantë. Ishte ajo që doja. Të luaja përsëri në Central”, ka thënë 37-vjeçari Di Maria. “Të jem kampion me Central është e vetmja gjë që më mungon. Nuk mund të besoja kur po ushtroja sot. Ndihesha sikur ishte hera e parë. E shijova plotësisht stërvitjen time të parë”
Di Maria u bashkua me Rosario Central kur ishte katërvjeçar dhe debutoi si profesionist me klubin argjentinas në moshën 17-vjeçare, në vitin 2005. Pasi e fitoi Kupën e Botës U17 në vitin 2007, ai u shit te Benfica.
Lojtari ofanziv është paraqitur kryesisht në krah. Ai më pas luajti për Real Madridin, Manchester Unitedin, Juventusin, Paris-Saint Germainin dhe së fundi sërish te Benfica. Ka fituar rreth 30 trofe. Ai shënoi gol për Argjentinën në finalen ndaj Francës në Kupën e Botës 2022, ndërsa ka fituar dy edicionet e fundit të Copa America.
Di Maria së fundi u paraqit në Kupën e Botës për Klube me Benfican. Shënoi tri gola për ekipin portugez që u ndal nga Chelsea në një të tetën e finales.
“Momentalisht nuk po mendoj për pensionim”, ka thënë ylli argjentinas.
“Po mendoj për lojën, për të shijuar kohën. Për të vazhduar në nivelin që e kam shfaqur deri më tani”, ka shtuar Di Maria.
