Presidenti amerikan, Donald Trump, ka deklaruar të hënën se Shtetet e Bashkuara të Amerikës (SHBA) do t’i dërgojnë më shumë armë Ukrainës, për ta ndihmuar vendin e dërrmuar nga lufta që ta mbrojë veten kundër sulmeve dhe përparimit të Rusisë, ka shkruar Reuters.

Vendimi i Washingtonit zyrtar për të pezulluar disa dërgesa të armatimit në drejtim të Kievit i kishte shtyrë zyrtarët e lartë ukrainas që të paralajmëronin se lëvizja do të dobësonte më tutje kapacitetet e Ukrainës për t’i parandaluar sulmet ajrore të Rusisë, si dhe përparimet e trupave ruse në fushën e betejës, duke tërhequr gjithashtu kritika nga anëtarë të Partisë Demokratike dhe disa prej Republikanëve të Trumpit.

“Do t’i dërgojmë disa armë. Duhet t’i dërgojmë disa. Ata duhet të jenë në gjendje ta mbrojnë veten”, ka thënë Trumpi para gazetarëve në Shtëpinë e Bardhë pak pas fillimit të darkës me kryeministrin izraelit, Benjamin Netanyahu.

“Ata po goditen shumë rëndë tani”, ka shtuar ai. “Ne do të dërgojmë më shumë armatim, armë mbrojtëse, kryesisht”.

Në Departamentin amerikan të Mbrojtjes kanë bërë të ditur përmes një njoftimi se do vazhdojnë të dërgojnë armatim shtesë për Ukrainën në saje të urdhrave të Trumpit, për t’u siguruar që ukrainasit të mbrojnë veten teksa përpjekjet vazhdojnë për të arritur marrëveshjen e paqes.

Të premten, Trumpi u kishte thënë gazetarëve se Ukraina kishte nevojë për raketa “Patriot” për t’u mbrojtur, porse nuk i përmendi ato në terma konkretë të hënën.

Ndërkaq, në deklaratën e Pentagonit nuk u dhanë detaje mbi armët që do të dërgohen në Ukrainë.

Pas një telefonate me Trumpin të premten, presidenti ukrainas, Volodymyr Zelensky, kishte njoftuar se që të dy liderët ranë dakord për të punuar në rritjen e kapacitetit të Kievit për të “mbrojtur qiellin”, ndërsa sulmet ruse po përshkallëzohen.

Zelensky pati shtuar po ashtu se liderët kishin diskutuar për prodhimin e përbashkët të armëve, blerjet dhe investimet.

Zyrtarët e lartë ukrainas kanë kërkuar të blejnë më shumë raketa dhe sisteme të mbrojtjes ajrore “Patriot” nga Washingtoni, të cilat konsiderohen thelbësore për mbrojtjen e qyteteve e rajoneve nga sulmet ajrore gjithnjë e më të ashpra të Rusisë.