Joao Pedro shënoi supergol në ndeshjen e parë si startues te Chelsea. Me golin e parë të tij, Chelsea po udhëhiqte 1:0 në gjysmëfinalen e Kupës së Botës për Klube. Ai po shënonte më pak se një javë pasi iu bashkua klubit londinez. Pas supergolit, Joao Pedro bëri dy hapa për të filluar festën dhe pastaj u ndal. Ngriti duart. E ndali gëzimin.

Në moshën 23-vjeçare, braziliani është në një klub të madh tashmë. Ai filloi në akademinë e Fluminenses kur ishte 10-vjeçar. Ishte transferuar te Watfordi në moshën 18-vjeçare dhe te Brightoni në moshën 21-vjeçare.

Debutoi me Brazilin në nëntor 2023, por si shumë nga yjet e futbollit brazilian, do të fitonte dukshëm më tepër para duke luajtur në Evropë.

“Nuk ka kuptim për Brazilin të provojë të garojë me klubet e Evropës sa u takon financave”, tha trajneri i Fluminenses, Renato Gaucho.

“Klubet braziliane prodhojnë lojtarët dhe i shesin ata në Evropë që mund të mbijetojnë. Dhe kështu ishte edhe në kohën kur unë isha lojtar”.

Klubet angleze përfitojnë nga popullariteti i Premier Leagues në mbarë botën dhe nga të hyrat e majme nga të drejtat e transmetimit. Bashkohen me klubet e mëdha nga Spanja, Gjermania, Italia dhe Franca në suksesin financiar të Ligës së Kampionëve.

Joao Pedro iu bashkua Chelseat nga Brightoni vetëm më 2 korrik. Chelsea është tani një fitore larg triumfit në Botërorin e Klubeve.

Por edhe në momentin e shkëlqimit, ai nuk harroi prej nga vjen.

“Ai klub më shfaqi para botës. Nëse jam këtu, është për faktin se në klub besuan tek unë. Kështu që jam shumë mirënjohës”, ka thënë Joao Pedro për Fluminensen.

Chelsea firmosi me brazilianin të mërkurën e javës së kaluar, pasi ai shënoi 19 gola në 58 ndeshje në Premier League për Brightonin. Ai debutoi ndaj Palmeirasit në çerekfinale, kur u aktivizua në pjesën e dytë.

Roberto de Zerbi, ish-trajneri i Brightonit dhe tani trajner te Marseille, ia rekomandoi Joao Pedron trajnerit të Chelseat, Enzo Maresca.

“Arsyeja pse e transferuam atë është sepse këtë stinor u përballëm me shumë ekipe me bllokadë të ulët. Dhe cilësia e tij është shumë e mirë kundër këtyre ekipeve”, ka thënë Maresca.

Sulmuesi i Chelseat, Liam Delap, ishte i pezulluar për shkak të kartonëve të verdhë dhe Maresca aktivizoi Joao Pedron. Derisa ekipi i Chelseat ka stërvitur dhe ka luajtur vazhdimisht që nga vera e kaluar, Joao Pedro nuk kishte luajtur në ndeshje që nga 19 prilli. Ky ishte një avantazh në ndeshjen e zhvilluar në vapë dhe lagështi të madhe në stadiumin “MetLife”.

“Ai ishte në pushime. Kështu që ndoshta ishte pak më i freskët se pjesa tjetër e skuadrës”, ka shtuar Maresca.