Në kushte të rënda të gjatë kësaj periudhe me temperatura të larta dhe mungesës së ujit për banorët e ish-komunës së Osllomesë, dega e BDI-së në Kërçovë ka reaguar ndaj institucioneve përgjegjëse dhe përfaqësuesve politikë shqiptarë në pushtet. Përmes një reagimi të drejtpërdrejtë, BDI Kërçovë denoncon situatën si pasojë të neglizhencës dhe keqmenaxhimit, duke i akuzuar drejtuesit në TEC Osllome dhe ELEM për shkelje të hapur të ligjit dhe për përçmim ndaj halleve të qytetarëve.

Në vijim sjellim reagimin e plotë.

REAGIM

"Qytetarët pa ujë – pushtetarët pa turp!”

Për të pestën ditë radhazi, banorët e ish-komunës së Osllomesë janë pa ujë – dhe pushteti hesht!

Ndërsa qytetarët presin me orë për pak ujë të pijshëm, Termocentrali i Osllomesë vazhdon të punojë, në kundërshtim të plotë me Ligjin për Ujërat që thotë qartë: uji për njerëzit ka përparësi ndaj industrisë!

 Por në vend që të marrin përgjegjësi, udhëheqësit shqiptarë nga koalicioni "VREDI" në TEC Osllome (Agim Sadiku) dhe ELEM (Rexhep Asani) zgjedhin të fajësojnë qytetarët, duke i ofenduar me akuza të turpshme për “keqpërdorim” të ujit – duke aluduar, pa asnjë provë, se uji keqpërdoret për ujitje të tokës bujqësore. Kjo është një gënjeshtër e pastër, sepse banorët nuk kanë ujë as për nevojat më bazike, e lëre më për ujitje.

Por edhe nëse do të ishte e vërtetë, sërish Ligji për Ujërat e Maqedonisë së Veriut e thotë qartë: edhe përdorimi i ujit për bujqësi ka përparësi ndaj përdorimit industrial. Pra, edhe sipas ligjit – jo vetëm sipas ndërgjegjes – qytetarët kanë të drejtë, jo termocentrali.

 Në këto ditë të nxehta, kur populli ka etje për ujë, pushteti shfaq etjen për arrogancë dhe poshtërsi.

 Po ua publikojmë nenin përkatës të Ligjit për Ujërat – që qytetarët ta lexojnë vetë dhe të kuptojnë se mungesa e ujit nuk është pasojë e “keqpërdorimit”, por rezultat i pastër i paaftësisë dhe hipokrizisë suaj. Ligji është i qartë – vetëm ju bëni sikur nuk ekziston.