Presidenti ukrainas, Volodymyr Zelensky, ka deklaruar të premten se Shtetet e Bashkuara të Amerikës i kanë rifilluar dërgesat e furnizimeve ushtarake për Ukrainën dhe se zyrtarët e lartë në Kiev do të angazhohen javën e ardhshme për të thelluar bashkëpunimin ushtarak me të dërguarin e posaçëm të Washingtonit, Keith Kellogg, ka raportuar The Guardian.

Ai ka theksuar se Ukraina kishte pranuar sinjale në nivel të lartë nga Washingtoni dhe aleatët e tjerë perëndimorë se furnizimet me armë, të cilat ishin pezulluar shkurtimisht javën e kaluar, tani sapo kanë rifilluar.

“Jemi duke punuar aktualisht me partnerët për furnizime të reja, rritjen e prodhimit të armëve në Ukrainë dhe mbështetje më të mirë për ushtrinë tonë”, ka thënë Zelensky. 

“Javën e ardhshme, do të vazhdojmë të punojmë me palën amerikane në nivel ushtarak, po ashtu jemi duke u përgatitur për pakot e reja të mbrojtjes nga Evropa”, ka shtuar ai.

Kellogg kishte thënë për mediumin ukrainas “Novyny.LIVE” në margjinat e konferencës për rindërtimin e Ukrainës në Romë se pala amerikane “do të jetë në Kiev të hënën, si dhe do të qëndrojë atje gjatë gjithë javës”.

E presidenti amerikan, Donald Trump, kishte njoftuar të enjten se SHBA-ja do ta furnizojë Ukrainën me armë përmes NATO-s dhe se ai do të lëshojë një “deklaratë të madhe” për Rusinë javën e ardhshme.

Ai kishte folur po ashtu edhe për atë që e kualifikoi si marrëveshje të re mes SHBA-së, aleatëve të NATO-s dhe Ukrainës lidhur me dërgimin e armëve amerikane, ndonëse kishte nënvizuar se aleanca veriatlantike do të paguajë për to.

“Ne po i dërgojmë armë NATO-s, dhe NATO-ja po paguan për ato armë, 100%. Pra, ajo që po bëjmë është që armët po dërgohen në NATO, dhe më pas NATO-ja do t’ia japë ato armë Ukrainës, dhe NATO-ja po paguan për to”, kishte thënë Trump.