Është parandaluar edhe një tjetër përpjekje për zjarrvënie, informoi drejtori i Drejtorisë për Mbrojtje dhe Shpëtim, Stojançe Angelov. Rojet pyjore të ndërmarrjes “Pyjet Kombëtare” në vendin e quajtur Altn Vrv, nën majën Carev Vrv, kanë gjetur dhe kanë hequr më shumë se 30 goma të hedhura të makinave, karton për ndezje, goma të brendshme dhe trupa e degë të thata të pishave.

“Nëse nuk do të ishte parandaluar, zjarri do të ishte përhapur shpejt në pyllin përreth”, tha drejtori i DMSH-së, duke falënderuar rojet pyjore të “Pyjeve Kombëtare” për reagimin e shpejtë dhe duke apeluar te qytetarët që të raportojnë raste të tilla nëse vërejnë sjellje të dyshimtë.

Vendi i quajtur Altn Vrv ndodhet në Malet e Osogovës, nën majën Carev Vrv, e cila është në lartësi prej 2.000 metrash mbi nivelin e detit. Në atë zonë pothuajse nuk ka fare lëvizje të njerëzve.

“Apelojmë te të gjithë qytetarët që nëse vërejnë sjellje të dyshimtë që mund të tregojë për qëllim zjarrvënie jashtë vendbanimeve – si goma, dërrasa, paleta druri, shishe plastike apo bidona me lëng që ngjan me benzinë – menjëherë të telefonojnë në numrin 112, ose të raportojnë në stacionin më të afërt të policisë apo te ndonjë pjesëtar i policisë ose shërbimeve të tjera të sigurisë”, njoftoi udhëheqësi i Shtabit Kryesor për Menaxhim të Krizave pranë DMSH-së, Angelov.