Pas përfundimit të aventurës në rrethin e parë kualifikues të Ligës së Evropës, ku u përball me një kundërshtar të fortë si Sheriff Tiraspoli (0:4 në udhëtim dhe 2:1 fitore në shtëpi), Prishtina tani përgatitet për sfidat e Ligës së Konferencës.

Në rrethin e dytë kualifikues të kësaj gare, bardhekaltrit do të përballen me Larne nga Irlanda e Veriut. Ndeshja e parë zhvillohet sonte, në orën 21:00, në stadiumin “Ballymena Showgrounds” me kapacitet prej 8 mijë ulësesh, ndërsa ajo kthyese luhet pas një jave në stadiumin “Fadil Vokrri”.

“Ekipi i Sheriff Tiraspol ka qenë në nivel më të lartë se sa kundërshtari ynë i sotëm. Sido që të jetë në këtë fazë të gjitha ekipet janë cilësore dhe kuptohet neve na duhet shumë angazhim që të paktën nga kjo ndeshje të dalim me rezultat pozitiv, në mënyrë që në ndeshjen e kthimit në kryeqytet ta mbushim stadiumin me tifozë, që do të na ndihmonin shumë për ta kaluar këtë fazë, e cila do të ishte shumë e rëndësishme për klubin tonë”, ka theksuar trajneri i Prishtinës, Arsim Thaçi para kësaj ndeshjeje.

 “Jemi të përgatitur maksimalisht për ndeshjen ndaj Larnes dhe e dimë rëndësinë që ka kjo sfidë për klubin dhe tifozët tanë. Do të japim gjithçka në fushë për të arritur një rezultat pozitiv. Kemi besim në grupin tonë dhe jemi të motivuar të tregojmë vlerat e Prishtinës në arenën ndërkombëtare, sidomos pas paraqitjes të cilën e treguam ndaj Sheriff Tiraspolit”, ka deklaruar kapiteni Leotrim Kryeziu për faqen zyrtare të klubit.

Në rast kualifikimi, Prishtina në rrethin e tretë do të përballet me fituesin e çiftit Varazhdin – Santa Clara.

Larne është klub me histori 136-vjeçare, i themeluar më 1889, por me suksese modeste në Irlandën e Veriut. Ka fituar titullin kampion në dy edicionet e fundit (2022/23 dhe 2023/24).

Nga klubet kosovare, edhe Ballkani është në këtë raund, pas fitores 4:2 ndaj Florianas së Maltës, ndërsa Drita garon në Ligën e Kampionëve dhe pas ndeshjes së parë në udhëtim u mposht 2:0 nga Copenhageni.

Larne është përballur më herët me skuadra nga Kosova. Në edicionin 2023/24 u eliminua nga Ballkani me rezultat të përgjithshëm 7:1, ndërsa në edicionin paraprak kishte eliminuar Ballkanin pas penalltive (4:1) dhe kishte arritur fazën e grupeve në Ligën e Konferencës, duke u bërë skuadra e parë nga liga irlandeze me këtë sukses.